რატომღაც დარწმუნებული ვარ, რომ ზემოხსენებული ინტერვიუს მოსმენის შემდეგ ასეთივე ამბივალენტური განწყობა დაეუფლებოდა ყველა ადამიანს, გარდა დღევანდელი საქართველოს პოლიტიკური რეჟიმის შეურიგებელი კრიტიკოსებისა, რომლებიც დარწმუნებულნი არიან, რომ კოკა სეფერთელაძე „პოლიტიკური ზომბია“ და მისი გამოსწორება ისევე შეუძლებელია, როგორც ჯერ „მოქკავშირის“, მერე კი „ნაცმოძრაობის“ პოლიტიკურ ინკუბატორში გამოჩეკილი ავანგარდისა, რომლის წარმომადგენლებსაც პარტიის ინტერსების გულისთვის შეუძლიათ უკადრებელი იკადრონ.

აშკარად უხერხულ მდგომარეობაში იგდებს თავს იმისათვის, რომ, ჩემი აზრით, SOS-სიგნალი რამდენჯერმე გამოუშვას კატასტროფის წინაშე მდგარი განათლების სამინისტროს კედლებიდან.

არადა, ვინც კოკა სეფერთელაძეზე ამ დღეებში დაუღალავად შაყირობთ, გთხოვთ, გულისყურით დააკვირდეთ ამ ახალგაზრდა კაცის გამომეტყველებას! ნახეთ როგორი სასოწარკვეთაა აღბეჭდილი მის სახეზე, როგორ განიცდის, როდესაც აშკარად უხერხულ მდგომარეობაში იგდებს თავს იმისათვის, რომ, ჩემი აზრით, SOS-სიგნალი რამდენჯერმე გამოუშვას კატასტროფის წინაშე მდგარი განათლების სამინისტროს კედლებიდან.
„ჩვენი მიზანია პედაგოგებისთვის კვალიფიკაციის ამაღლება, ამ ადამიანებზე ზრუნვა. სწორედ ამიტომ ჩვენ შევქმენით მასწავლებელთა სახლი, სადაც 24 საათის განმავლობაში თითოეულ პედაგოგს ჩვენ ვატრეინინგებთ იმისათვის, რათა მათ შეძლონ სასერტიფიკაციო გამოცდების ჩაბარება. ჩვენი ამოცანა არის მათი კვალიფიკაციის ამაღლება და გამოცდაზე მათი წარმატება არის ნამდვილად ჩვენი ამოცანა და არა ვინმეს ჩაჭრა“...
საქართველოს საზოგადოებრივი მაუწყებლისათვის დავით პაიჭაძის მიერ ჩაწერილ ხუთწუთიან ექსკლუზიურ ინტერვიუში, კოკა სეფერთელაძემ ეს ეზოტერული, დაშიფრული ფრაზა სამჯერ გაიმეორა და მეოთხედ მის განმეორებას თავადვე არჩია მიკროფონის მოხსნა და ტელეკამერის წინ საჯარო „ანდერმაინინგი“ (ეს კიდევ ერთი სახელმწიფო მოხელის ლექსიკონიდანაა).
დიახ, სწორედ ამ „თვითანდერმაინინგში“ მე ვხედავ კოკა სეფერთელაძის თავდადებას!
მან, ფაქტობრივად, ფარდა ახადა საქართველოს განათლების სამინისტროში ფეხმოკიდებულ საკაცობრიო მასშტაბის დანაშაულს, რაც ადამიანის შრომითი უფლებების შებღალვაში გამოიხატება!

გული მეუბნება, რომ მალე „მასწავლებელთა სახლები“ საქართველოში წარმოების რიტმს მოუმატებენ და, შესაძლოა, მასწავლებელთა 24-საათიანი „დატრენინგების“ პროგრამა დღე-ღამეში 48 საათამდე გაიზარდოს!

8-საათიანი სამუშაო დღე კაცობრიობის უდიდესი მონაპოვარია, რასაც არაერთი ადამიანის სიცოცხლე შეეწირა ბარიკადებზე, ბრძოლის ველსა და სატუსაღოებში. საქართველოში კი, თურმე, ქართველ პედაგოგებს, 24 საათი იქამდე „ატრენინგებენ და ატრენინგებენ“ „მასწავლებელთა სახლებში“, სანამ სასერტიფიკატო გამოცდებს წარმატებით ჩააბარებენ და იგრძნობენ, რომ ასეთი „აღკვეთა“ მათსავე ბედნიერებას ემსახურება!
საინტერესოა, რა ლოზუნგი აქვთ „მასწავლებელთა სახლებს“ საქართველოში? – „ტრენინგი ათავისუფლებს“, თუ „მხოლოდ სერტიფიკატს შეუძლია მოგანიჭოს სრული სიმშვიდე“?
განათლების მინისტრის მოადგილის ამ მოულოდნელი აღიარების შემდეგ, ნორმალურ ქვეყანაში ეს „მასწავლებელთა სახლია“, თუ გულაგის არქიპელაგი სასწრაფოდ უნდა დაიშალოს, სამინისტროს ხელმძღვანელობა კი სისხლის სამართლის პასუხისგებაში უნდა მიეცეს ადამიანების ფუნდამენტური უფლებების შელახვის გამო!
თუმცა, საქართველოში, შესაძლოა, საპირისპირო სურათიც ვიხილოთ!
ვინაიდან საქართველოს ხელისუფლება მიღწეულზე არასოდეს ჩერდება, გული მეუბნება, რომ მალე „მასწავლებელთა სახლები“ საქართველოში წარმოების რიტმს მოუმატებენ და, შესაძლოა, მასწავლებელთა 24-საათიანი „დატრენინგების“ პროგრამა დღე-ღამეში 48 საათამდე გაიზარდოს!
ასეთი ვარაუდის უფლებას იძლევა გამოცდების ეროვნული ცენტრის ხელმძღვანელის პოსტზე შინაგან საქმეთა სამინისტროს პოლიციის აკადემიის ყოფილი უფროსის, თავისი მიღწევებით „ძალიან ამაყი“ და უშრეტი ენერგიის ხატია დეკანოიძის დანიშვნა, რომელიც, განათლების მინისტრ დიმიტრი შაშკინის თქმით, „ახალ ეტაპზე გადაიყვანს განათლების რეფორმას“.