ორიოდე კვირის წინ მიხეილ სააკაშვილმა ქუთაისში ყოფნისას განაცხადა, - „2-3-4 წელიწადი დამაცადეთ და წყალტუბოს მსოფლიო მნიშვნელობის კურორტად ვაქცევო“. ამ ფრაზამ საზოგადოების გარკვეული ნაწილის გაღიზიანება გამოიწვია და მაშინ ითქვა, სააკაშვილმა ამით ქართულ საზოგადოებას კიდევ ერთხელ მიანიშნა, რომ ხელისუფლებიდან წასვლას არც კი განიხილავს.

გუშინ კი მსგავსი განცხადება პარლამენტის თავმჯდომარემ, დავით ბაქრაძემ გააკეთა. ახალგაზრდულ პარლამენტთან შეხვედრაზე მან თქვა, რომ ახალი თაობა მმართველი გუნდისგან ხელისუფლებას დაახლოებით 7-8-10 წელიწადში გადაიბარებს. ამასთანავე, ბაქრაძემ ძალიან საინტერესო განცხადებაც გააკეთა. კერძოდ, მან აღნიშნა, რომ მმართველი გუნდი როცა იგრძნობს, რომ ვადა გაუვიდა, ხელისუფლებიდან თავად წავა.

„როდესაც ჩემი თაობა იგრძნობს, რომ ვადა გაგვივიდა, ნამდვილად წავალთ და თაობა, რომელსაც ეს ქვეყანა უნდა გადავაბაროთ, ხართ თქვენ! როცა ვამბობ, რომ ხელისუფლებას თქვენი თაობა ჩაიბარებს და გადაიბარებს, არ ვლაპარაკობ 30 და 40 წლის პერსპექტივით, ეს შეიძლება, მოხდეს სულ რაღაც 7-8-10 წელიწადში და 8 და 10 წელი ცხოვრებაში ძალიან სწრაფად გადის“, - მიმართა ბაქრაძემ პარლამენტის სხდომათა დარბაზში შეკრებილ ახალგაზრდული პარლამენტის წევრებს.

მისი ამ განცხადების ანალიზს თუ გავაკეთებთ, საყურადღებოა ორი მომენტი. ჯერ ერთი, ბაქრაძე მიგვანიშნებს, რომ ნაცმოძრაობა კიდევ დაახლოებით ათი წლის განმავლობაში აპირებს ხელისუფლებაში დარჩენას და მეორეც, თურმე ისინი როდესაც თავად იგრძნობენ, რომ ვადა გაუვიდათ, მხოლოდ ამის შემდეგ აპირებენ წასვლას. ჯერ საკითხვია, როდის იგრძნობს ნაცმოძრაობა, რომ „ვადა გაუვიდა“, როგორც ამას ბაქრაძე ამბობს, რადგან როგორც წესი, ხელისუფლებიდან თავისი ნებით არავინ მიდის. მით უფრო გაუჭირდებათ ამის გაკეთება ნაციონალებს, რომლებიც, ექსპერტების შეფასებით, თანამზრახველებად არიან ქცეულები და ხელისუფლებიდან წასვლის შემთხვევაში, არა მხოლოდ თანამდებობების დაკარგვა, არამედ, შესაძლოა, ბევრ მათგანის სისხლის სამართლის პასუხისგმებლობაც დაისვას. ამიტომ ცხადია, რომ ისინი თავისი ნებით ხელისუფლებას არ დათმობენ.

გარდა ამისა, ბაქრაძის განცხადებით თუ ვიმსჯელებთ, გამოდის, რომ „ნაციონალური მოძრაობა“ ხელისუფლებიდან მაშინ წავა, როცა თავად მოესურვება და რაც ყველაზე მნიშვნელოვანია, მმართველი ძალა დემოკრატიული იმიჯის შექმნასაც კი არ ცდილობს. პარლამენტის თავმჯდომარემ  ღიად დააფიქსირა, რომ ისინი არჩევნებს არ აღიარებენ.

ამ თემაზე presage.tv ექსპერტებსა და პოლიტიკოსებს ესაუბრა.

პოლიტოლოგი რამაზ საყვარელიძე მიიჩნევს, რომ დავით ბაქრაძეს ძალიან უხერხული ფრაზა გამოუვიდა.

„ალბათ, სასურველი იქნებოდა ბაქრაძეს თვითონ მიეცა ამ ფრაზისთვის რეაგირება და ეს საკითხი ჩვენი საკომენტარო არ გამხდარიყო, რადგან ისე გამოუვიდა, მეფე რომ იტყვის, ჩემს ძალაუფლებას როცა მინდა, ჩემს შვილებს მაშინ მივცემო. არადა „ნაციონალურ მოძრაობას“ ხელისუფლება ასეთი ფეოდალური პრინციპით არ უპყრია. ხელისუფლების საკითხს დემოკრატიულ საზოგადოებაში თვითონ საზოგადოება წყვეტს. ასე რომ, როდესაც მმართველი პარტიის წარმომადგენელი ამგვარ რაღაცას ამბობს, ამით არა მხოლოდ შეურაცხყოფას აყენებს დემოკრატიას, არამედ იგი აჩვენებს, რომ ხელისუფლებიდან წასვლის პროცესი არ აქვს ჩაფიქრებული, როგორც დემოკრატიული პროცესი“, - აცხადებს რამაზ საყვარელიძე presage.tv-სთან საუბარში.

მისი თქმით, დავით ბაქრაძეს წარმოდგენილი აქვს, რომ ძალაუფლება მემკვიდრეობით მიიღო და ახლა ფიქრობს, ვის გადასცეს იგი. ექსპერტი აცხადებს, რომ გასათვალისწინებელია ისიც, პოლიტიკოსების სიტყვები ხშირად არა განზრახვის გასაჟღერებლად, არამედ მის დასაფარადაც გამოიყენება. რამაზ საყვარელიძის აზრით, ნაცმოძრაობის წევრები რომ ფიქრობდნენ, რომ ხელისუფლებაში კიდევ დიდხანს აპირებენ დარჩენას, მაშინ ძალაუფლების შესანარჩუნებლად ასეთ გაცხარებულ ბრძოლას არ გააჩაღებდნენ.

„რა თქმა უნდა, ხელისუფლებიდან თავისი სურვილით არავინ წავა, მაგრამ სხვა საკითხია აღიარო კანონი, რომლითაც ხელისუფლება იცვლება და დაემორჩილო მას. ამის მაგალითი სულ ცოტა ხნის წინ საფრანგეთმა გვაჩვენა, როდესაც სარკოზის ხელისუფლებიდან წასვლა აშკარად არ უნდოდა, მაგრამ მას მეტი გზა არ ჰქონდა და ხალხის ნებას დაემორჩილა. პრობლემა იმაში კი არ არის, რომ ნაცმოძრაობის წარმომადგენლებს წასვლა არ უნდათ, საქმე იმაშია, რომ ისინი არ აპირებენ ბევრ რამეში კანონს ანგარიში გაუწიონ“, - აღნიშნავს საყვარელიძე.

„თავისუფალი დემოკრატების“ წევრი ზურაბ აბაშიძე აცხადებს, რომ დავით ბაქრაძე ამ ქვეყანაში ის ფიგურა არ არის, რომ მას ნაცმოძრაობაში რამე გადაწყვეტილებების მიღების პროცესში ვინმე რამეს ეკითხებოდეს. ამასთანავე, იგი არ არის ის ადამიანი, რომელიც უნდა წყვეტდეს, დარჩებიან ნაციონალები ხელისუფლებაში, თუ - არა. აქვე აბაშიძე აღნიშნავს, რომ ამ შემთხვევაში დავით ბაქრაძე არა თავის, არამედ სააკაშვილის მოსაზრებებს აჟღერებს.

„ეს ადამიანები ფიქრობენ, რომ ხელისუფლებაში სამუდამოდ არიან მოსულები, მაგრამ 27 მაისს ისინი კარგად დაინახავენ, რა იცვლება ქვეყანაში და როგორ დამთავრდება მათი ამბავი. ჩვენ არავის ვემუქრებით, უბრალოდ შემოდგომაზე ყველაფერი გაირკვევა, როდესაც ხმებს დავითვლით“, - ამბობს ზურაბ აბაშიძე.

„რესპუბლიკური პარტიის“ წევრი ლევან ბერძენიშვილი აღნიშნავს, რომ ამგვარ განცხადებებს ხელისუფლების მეორე და მესამეხარისხოვანი პირები აკეთებენ.

„ადრე ასეთ განცხადებებს აკეთებდა გია ბარამიძე და ამბობდა, რომ ხელისუფლებაში 70 წლით არის მოსული. ახლა კი დავით ბაქრაძე ამბობს, რომ ხელისუფლებაში 10 წელი დარჩება. მინდა გითხრათ, დიდი მნიშვნელობა არ აქვს, რას ფიქრობს ბაქრაძე. იქნებ მაგას ოცნება აქვს, რომ 100 წელიც იყოს ხელისუფლებაში, მაგრამ წელს იქნება არჩევნები და ხალხი გადაწყვეტს, როდემდე იქნებიან ეს ადამიანები ხელისუფლებაში. მართალია, ბაქრაძე „ჯიპა“-ს სტუდენტი იყო და ინტელექტუალადაც ითვლება, მაგრამ მისი ეს ნათქვამი მიუთითებს იმაზე, რომ იგი არ დაფიქრდა რაზე ლაპარაკობდა. ისინი უბრალოდ არჩევნების წინ გვაშინებენ, რომ მათთან ბრძოლას აზრი არ აქვს და ისინი ათი წლის შემდეგ წავლენ ხელისუფლებიდან, და თუ არ დაიღალნენ, მაშინაც არ წავლენ და ა.შ.

მაგრამ არჩევნები არის წელს, სავარაუდოდ, ოქტომბერში და შეიძლება ოქტომბერში გადაწყდეს, რომ დავით ბაქრაძე აღარ იქნება არა მხოლოდ პარლამენტის თავმჯდომარე, არამედ შეიძლება პარლამენტის რიგითი წევრიც კი“, - ამბობს ლევან ბერძენიშვილი.

რაც შეეხება დავით ბაქრაძეს, ბერძენიშვილის თქმით, ამ ადამიანს ქართულ პოლიტიკაში გავლენა ისეთი აქვს, რომ იგი პოლიტიკაში ჯერ არც კი მოსულა, მას არავინ არც პარლამენტისას ეკითხება რამეს და არც კანონმდებლობისას. ბერძენიშვილი აცხადებს, რომ დავით ბაქრაძე არის პარლამენტის ნომინალური თავმჯდომარე, როგორიც საქართველოს პარლამენტს აქამდე არ ჰყოლია.

„თავისუფალი საქართველოს“ ლიდერის, კახა კუკავას განცხადებით, ბაქრაძის ეს განცხადება არის ერთგვარი სიგნალი, რომელსაც ნაციონალები მოსახლეობას უგზავნიან და სურთ დაარწმუნონ ქართული საზოგადოება, რომ ისინი შეუცვლელები არიან.

„მიხეილ სააკაშვილი ძალიან ხშირად მექსიკის და იაპონიის მაგალითებს იშველიებდა, სადაც ერთი პარტიის მმართველობა 50 წელზე მეტხანს გრძელდებოდა. რამდენიმე კვირის წინ მან განაცხადა, რომ 3-4 წელიწადში წყალტუბოს აქცევს მსოფლიო დონის კურორტად, ახლა კი ბაქრაძე ამბობს, რომ ათი წელი დარჩება ხელისუფლებაში. მათი დაუფარავი სურვილი არის ის, რომ სამუდამოდ დარჩნენ საქართველოს ხელისუფლებაში, სანამ ქართული საზოგადოება მათ ლინჩის წესით არ გაასამართლებს“, - აღნიშნავს კახა კუკავა.

მისი თქმით, ნაციონალებისთვის არჩევნები არის იგივე, რაც არის ჩინეთისთვის, ან ნებისმიერი დიქტატურისთვის. კუკავა იხსენებს საბჭოთა პერიოდს, როდესაც 70 წლის განმავლობაში მართალია, არჩევნები ტარდებოდა, მაგრამ ყოველთვის ერთი პარტია იმარჯვებდა, თუმცა საზოგადოების ნება ასეთი არ იყო.

„არჩევნების ტრადიცია, რომელიც ევროპაში არსებობს, როდესაც რამდენიმე წელიწადში პარტიები ერთმანეთს ცვლიან და ამ როტაციას მუდმივად ციკლური ხასიათი აქვს, საქართველოს ხელისუფლებისათვის ასეთი რამ მიუღებელია. აქ მხოლოდ პრეზიდენტის არჩევნებზე არ არის საუბარი. რა თქმა უნდა, ეს ყველაზე მნიშვნელოვანი საკითხია, მაგრამ აქვე უნდა აღინიშნოს, რომ ჩვენ ჩრდილო კორეის ტიპის დიქტატურაში ვცხოვრობთ, სადაც ყველა სახელმწიფო პოსტს მმართველი პარტია აკონტროლებს. არც ერთ ქვეყანაში, რომელსაც დემოკრატიულობაზე აქვს პრეტენზია, არ ხდება ისე, რომ პრეზიდენტი, პარლამენტის თავმჯდომარე, ყველა გამგებელი, ყველა გუბერნატორი და ყველა საკვანძო თანამდებობის პირი ერთი პარტიის წევრი იყოს“, - ამბობს კუკავა.