"ქართული ოცნების" ლიდერის ბიძინა ივანიშვილის პრესსპიკერი მაია ფანჯიკიძე უარყოფს ინფორმაციას იმის შესახებ, რომ კოალიცია "ქართული ოცნების" მაჟორიტარი კანდიდატები პაატა ბურჭულაძე და ჯემალ ჭკუასელი იქნებიან. გავრცელებული ინფორმაციით, ფონდ "იავნანას" დამფუძნებლის პაატა ბურჭულაძის კანდიდატურას - ჩოხატაურში წარადგენენ, "ერისიონის" ხელმძღვანელ ჯემალ ჭკუასელს კი ოზურგეთში.
"ეს ინფორმაცია პირველად მესმის. არც ერთი კანდიდატი ნამდვილად ჯერ არ არის შეთანხმებული", - განუცხადა მაია ფანჯიკიძემ გაზეთ "ალიას". ფანჯიკიძე გამორიცხავს, რომ ეს იდეა სამომავლოდ განიხილება.
ჯემალ ჭკუასელი ამჟამად საბერძნეთში იმყოფება, ამ თემაზე დუმს პაატა ბურჭულაძეც.
16 მაისს "ქართული ოცნების" ლიდერი ბიძინა ივანიშვილი საერთაშორისო საქველმოქმედო ფონდ "იავნანას" დამფუძნებელ პაატა ბურჭულაძეს შეხვდა.
