საპარლამენტო უმრავლესობის წარმომადგენელი ნუგზარ წიკლაური ირიბად ადასტურებს იმას, რომ ხელისუფლება შეიარაღებულ რაზმებს ქმნის. შეიარაღებული რაზმების შექმნის შესახებ განცხადება „თავისუფალი დემოკრატების“ ლიდერმა, ირაკლი ალასანიამ 15 მარტს დიპლომატებთან გამართულ შეხვედრაზე გააკეთა.
წიკლაური ამბობს, რომ ამ რაზმების არსებობა დამალული არ არის და ესენი მოხალისე რეზერვისტები არიან. თუმცა, მისი თქმით, ალასანიას ეს განცხადება საგანგაშო იმით არის, რომ მან აღიარა მისი პოლიტიკური ძალის კავშირი შეიარაღებულ დაჯგუფებებთან და სათანადო ორგანოებს მოუწოდებს, ამ საკითხით განსაკუთრებულად დაინტერესდნენ.
რის საფუძველზე ამბობს ამას და როგორ აფასებს ხელისუფლება აშშ-ის ელჩის გუშინ „ფეისბუკზე“ გამოქვეყნებულ განცხადებას, სადაც ჯონ ბასი შემაშფოთებელს უწოდებს კონტროლის პალატის ქმედებებს, ამ საკითხებთან დაკავშირებით presage.tv ნუგზარ წიკლაურს ესაუბრა.
ნუგზარ წიკლაური: ეს არის ნებაყოფლობითი რეზერვი, რომელიც არის სრულიად გამჭვირვალე. მის შესახებ რამდენიმე სატელევიზო გადაცემაც კი იყო. ნებაყოფლობითი რეზერვის ამოცანა არის ის, რომ, როდესაც საქართველოს ტეროტორიის ნაწილები არის ოკუპირებული, მნიშვნელოვანია, მოსახლეობაში სამხედრო უნარ-ჩვევები იყოს ამაღლებული და ეს არავისთვის დამალული და დაფარული არ არის.
მოსახლეობისთვის სამხედრო უნარ-ჩვევების ამაღლება მხოლოდ ზუგდიდშია საჭირო?
- ეს არ არის მხოლოდ ზუგდიდში და არც მხოლოდ სამეგრელოში. ასეთი შეკრებები იყო, მინიმუმ, ქართლში, გორში და, შესაძლოა, კიდევ კახეთში. ასე რომ, ეს მოიცავს მთელ საქართველოს, მათ შორის თბილისსაც და გითხარით, რომ ამის ამოცანა არის ის, რომ მოსახლეობას ჰქონდეს ისეთი უნარ-ჩვევები, რომელიც მას დაიცავს, ვთქვათ, იმ ვითარებაში, თუკი რაიმე სახის გართულება იქნება.
ამ ადამიანებს იარაღი აქვთ?
- არა, რა თქმა უნდა. ისინი გადიან ერთკვირიან მომზადებას. ისინი ეუფლებიან თავდაცვის სხვადასხვა საშუალებებს და შემდეგ ბრუნდებიან სახლებში და თან არაფერი არა აქვთ, არც იარაღი, არც ფორმა და არც არაფერი.
ამ ადამიანებს ვინ წვრთნის? ვის ემორჩილებიან?
- ეს ხდება თავდაცვის სამინისტროს მიერ. ნებაყოფლობითი რეზერვი არის თავდაცვის სამინისტროს პროექტი და კიდევ ერთხელ ხაზგასმით ვამბობ, რომ ეს არის ღია პროექტი და არავის არ დაუმალავს, რომ ადამიანები იკრიბებიან.
საერთოდ, თუ ვინმეს სურს, რომ ამ ტიპის რაღაცა რაზმები მოამზადოს, რაზეც ალასანია ლაპარაკობს, გარწმუნებთ, რომ ტელევიზიით არ იქნებოდა გადაცემული.
ახლა რაც შეეხება ალასანიას განცხადების მეორე მხარეს. იგი ლაპარაკობს რაღაცა სამოქალაქო ომზე და მე ვფიქრობ, ეს არის ძალიან შემაშფოთებელი განცხადება, რომელსაც ჩვენ უნდა მივაქციოთ ყურადღება იმიტომ რომ, თუ, ერთი მხრივ, ამ შემთხვევაში იგი მოიაზრებს სამოქალაქო ხელისუფლებას და მის შეიარაღებულ ფორმირებებს, სამოქალაქო ომის მეორე მხარე უნდა იყოს ვიღაც, რომელსაც ასევე აქვს იარაღი.
ეს, შესაძლოა, არის წამოცდენა. მაგრამ, თუკი „ქართულ ოცნებას“ აქვს ამ ტიპის შეიარაღებულ ფორმირებებთან კავშირი, ვფიქრობ, რომ შესაბამისი ორგანოებისთვის არის ძალიან კარგი მასალა, უფრო მეტად დააკვირდნენ ამ ორგანიზაციას.
აშშ-ის ელჩის განცხადებაზე რას იტყვით?
- მის ამ განცხადებას აქვს ორი მხარე. ერთი მხარე არის ის, რომ კონტროლის პალატა რასაც ახორციელებს, ეს არის ეფექტური მექანიზმი და მიმართულია იქითკენ, რომ ოლიგარქიული, შავი ფულის, უკანონო ფინანსების შემოდინება ქართულ პოლიტიკაში იყოს მინიმიზებული. ეს არის სწორი ამოცანა, რომელიც კონტროლის პალატას ქართულმა სახელმწიფომ დაუსვა.
მეორე მხარე არის ის, რომ ამ გამოკითხვის სხვადასხვა მონაწილეები აცხადებენ, თითქოს, მათი უფლებები იქნა შელახული და ყველა ამ კონკრეტულ ფაქტზე უნდა იქნას ჩატარებული გამოძიება. მე მართალა არ შემიძლია, გითხრათ, მართლა ასე იყო ეს ვითარება, როგორც აღწერენ ეს ადამიანები თუ ისე იყო, როგორც აღწერენ გამომკითხველები. ამიტომ, ყველა ამ კონკრეტულ შემთხვევაზე უნდა იყოს სწორი ინფორმაცია.
ანუ, თქვენ ფიქრობთ, რომ ჯონ ბასს არა აქვს სწორი ინფორმაცია?
- ჯონ ბასი ამბობს, რომ ეს ცნობები იწვევს რაღაცა წუხილს. მაგრამ ეს ცნობები რომ არ არის დადგენილი, ეს ყველამ იცის და რამდენად დადასტურდება, ძნელი სათქმელია.
მთავარი არის ის, რომ სახელმწიფო იქცევა სწორად, როდესაც ახორციელებს კონტროლს და ჩვენ ვნახეთ, რომ ეს ადამიანები იღებდნენ ფულს, თუ არ ვცდები, 50 ლარს თითო ადამიანის ხელმოწერისთვის და თავად ადასტურებენ ამას. ეს ადამიანები არემონტებდნენ ოფისებს, ყიდულობდნენ რაღაცა ნივთებს და არ არის ამის დოკუმენტაცია და ეს არის სწორი ქმედებები.
