იუსტიციის მინისტრის, თეა წულუკიანის განცხადებით, უკვე არის მთავარი პროკურორობის შვიდი კანდიდატი. როგორც თეა წულუკიანმა ჟურნალისტებს განუცხადა, აღნიშნული პირები სხვადასხვა აკადემიურმა წრეებმა და საზოგადოებამ წარმოადგინეს.
"ჩვენ უკვე გვყავს შვიდი კანდიდატი, რომლებიც სხვადასხვა აკადემიურმა წრეებმა და საზოგადოებამ წარმოადგინეს ჩემ წინაშე. მე მომიწევს, რომ ამ კანდიდატებიდან სამი პირი შევარჩიო. გასაუბრებებს ჩავატარებ დღეს, ხვალ, მიმდინარე კვირაში, იმისთვის, რომ მომავალ კვირას მე შევძლო საპროკურორო საბჭოს სამპირიანი სია წარვუდგინო", - განაცხადა წულუკიანმა.
მისივე თქმით, შემოსული კანდიდატების შესახებ დეტალური ინფორმაცია საჯაროა საპროკურორო საბჭოს ვებგვერდზე, ხოლო სამპირიანი სია საჯარო, სავარაუდოდ, 18 ნოემბერს გახდება.
