საქართველოს მთავარი პროკურატურის განცხადებით, ერთ-ერთი დეპარტამენტის უფროსს, ნათია მეზვრიშვილს შეზღუდვებისგან განთავისუფლების დამადასტურებელი საშვი – ე.წ. ნარუშილოვკა სარგებლობაში არც თანამდებობაზე ყოფნის პერიოდში და არც მანამდე არ ჰქონია. ამ განცხადებით მთავარი პროკურატურა ყოფილი პატრულ-ინსპექტორის, გიორგი ბაბუნაშვილის "რუსთავი 2"-ში გაკეთებულ განცხადებას ეხმაურება, რომლის მიხედვითაც მეზვრიშვილი ე.წ. ნარუშილოვკას ჩვენების შემდეგ გაუშვა.
"საინფორმაციო საშუალებებით პროკურატურის თანამშრომლების მიერ "საგზაო მოძრაობის წესებით გათვალისწინებული აკრძალვებისა და შეზღუდვებისაგან განთავისუფლების დამადასტურებელი საშვის" - ე.წ. "ნარუშილოვკების" გამოყენების შესახებ გავრცელებულ ინფორმაციასთან დაკავშირებით მთავარი პროკურატურა განმარტავს, რომ ნათია მეზვრიშვილი 2013 წლის დეკემბრიდან არის საქართველოს მთავარი პროკურატურის საპროკურორო საქმიანობაზე ზედამხედველობისა და სტრატეგიული განვითარების დეპარტამენტის უფროსი. თანამდებობაზე ყოფნის პერიოდში და არც მანამდე მას სარგებლობაში არ ჰქონია ზემოაღნიშნული საშვი", - ნათქვამია განცხადებაში.
საგამოძიებო უწყებაში განმარტავენ, რომ მეზვრიშვილის სარგებლობაში მყოფ ავტომობილის მინების დაშუქებაზე არის საპატრულო პოლიცის მიერ გაცემული თანხმობის დამადასტურებელი საბუთი. უწყებაში აღნიშნავენ, რომ ის დამუქების შემოწმების მიზნით გააჩერეს და მან პატრულის თანამშრომელს სწორედ ეს საბუთი წარუდგინა. პროკურტურის განცხადებით, გადაცემა "არჩევანის" მიერ გავრცელებული ფაქტი ერთ-ერთ მსგავს შემთხვევას ასახავს.
"ნ.მეზვრიშვილის სარგებლობაში არსებულ სამსახურებრივ სატრანსპორტო საშუალებაზე საქართველოს შს მინისტრის 2014 წლის 28 თებერვლის №165 ბრძანებით დამტკიცებული ავტოსატრანსპორტო საშუალებათა მინების დამუქების წესის საფუძველზე საპატრულო პოლიციის დეპარტამენტის მიერ გაცემულია თანხმობის დამადასტურებელი მოწმობა სატრანსპორტო საშუალებაზე არსებულ დამუქებაზე, რომელიც ნ.მეზვრიშვილის მიერ წარედგინა საპატრულო პოლიციის თანამშრომელს დამუქების შემოწმების დროს. ნათია მეზვრიშვილი, მისი განმარტებით, რამოდენიმეჯერ მართლაც არის გაჩერებული საპატრულო პოლიციის თანამშრომლების მიერ ავტომანქანაზე მინების დამუქების გამო, რა დროსაც ამოწმებენ ხსენებული ნებართვის არსებობას. გუშინ გადაცემა "არჩევანის" მიერ გავრცელებული ფაქტი ერთ-ერთ მსგავს შემთხვევას ასახავს", - ნათქვამია განცხადებაში.
ამასთან, პროკურატურაში აცხადებენ, რომ "პროკურატურის შესახებ" საქართველოს კანონის თანახმად, პროკურატურა კანონმდებლობით გათვალისწინებულ შემთხვევებში სრული მოცულობით ატარებს როგორც გამოძიებას, ასევე ოპერატიულ-სამძებრო ღონისძიებებს, აგრეთვე ახორციელებს სისხლისსამართლებრივ დევნას, მხარს უჭერს სახელმწიფო ბრალდებას, ზედამხედველობს კანონის ზუსტ და ერთგვაროვან შესრულებას ოპერატიულ-სამძებრო ორგანოების საქმიანობისას, კოორდინაციას უწევს დანაშაულის წინააღმდეგ ბრძოლას.
"აღნიშნული ფუნქციების განსახორციელებლად პროკურატურის თანამშრომლები სამსახურეობრივი საჭიროების შემთხვევაში უფლებამოსილი არიან გამოიყენონ "საგზაო მოძრაობის წესებით გათვალისწინებულ აკრძალვებისა და შეზღუდვებისაგან განთავისუფლების დამადასტურებელი საშვი", - ნათქვამია პროკურატურის განცხადებაში.
უწყების განცხადებით, მიუხედავად იმისა, რომ ტელეკომპანია "რუსთავი-2" მთავარი პროკურატურის საზოგადოებასთან და მასმედიასთან ურთიერთობის დეპარტამენტის მიერ სრულად იყო ინფორმირებული, რომ ნათია მეზვრიშვილს არასოდეს ჰქონია სარგებლობაში სპეციალური საშვი, ტელეკომპანიის მხრიდან მაინც მოხდა აღნიშნული არასწორი ინფორმაციის გავრცელება, რასაც პროკურატურა აფასებს საზოგადოების შეცდომაში შეყვანის მცდელობად.
"ჩვენს პოზიციას ადასტურებს ის ფაქტიც, რომ გავრცელებულ კადრებში არ ჩანდა რა დოკუმენტი მოითხოვა საპატრულო პოლიციის თანამშრომელმა და რა წარუდგინა მას მეზვრიშვილმა. საქართველოს პროკურატურას პროკურატურის მუშაკის ეთიკის კოდექსიდან გამომდინარე, პროკურატურის მუშაკთა მხრიდან საზოგადოებრივი წესრიგის დარღვევის ფაქტებზე შემუშავებული აქვს მკაცრი პოლიტიკა. პროკურატურის არც ერთი თანამშრომელი არ სარგებლოს არანაირი პრივილეგიით სატრანსპორტო საშუალების მოძრაობის უსაფრთხოების წესების დარღვევისათვის, რაზეც მეტყველებს 2014 წელს საპატრულო პოლიციის დეპარტამენტის მიერ პროკურატურის თანამშრომლების მიმართ შედგენილი ადმინისტრაციული სამართალდარღვევის 21, ხოლო 2015 წელს შედგენილი 25 ოქმი. ადმინისტრაციული სამართალდარღვევის თითოეულ ფაქტზე მთავარი პროკურატურის გენერალური ინსპექცია ახდენს სათანადო რეაგირებას, რაზეც მხოლოდ 2014-2015 წლებში დისციპლინური წესით დასჯილია პროკურატურის 11 თანამშრომელი, მათ შორის ადმინისტრაციული სამართადარღვევის სიმძიმის გათვალისწინებით 6 პირი დათხოვნილი იქნა პროკურატურიდან", - ნათქვამია განცხადებაში.