საქართველოს, მთავრობის ეფექტიანობის მხრივ, 2014 წელს, ბოლო 18 წლის განმავლობაში საუკეთესო მაჩვენებელი აქვს, - მთავრობის ადმინისტრაციის პრესსამსახურის ინფორმაციით, ამის შესახებ ნათქვამია მსოფლიო მმართველობის გრძელვადიან კვლევაში, რომელიც მსოფლიო ბანკმა გამოაქვეყნა. 
მთავრობის ეფექტიანობის მაჩვენებელი 2012 წელს 69,9% იყო, ხოლო 2014 წელს - 71,6%-ია. 
2012 წელთან შედარებით საქართველომ რეიტინგი 3 პუნქტით გაიუმჯობესა და 2014 წელს მე-60 ადგილი დაიკავა, რითაც გაუსწრო როგორც რეგიონის, ასევე ევროკავშირის წევრ ქვეყნებს, რომელთა შორის არიან საბერძნეთი, თურქეთი, იტალია, ბულგარეთი, რუმინეთი სომხეთი, აზერბაიჯანი, ალბანეთი, რუსეთი, მოლდოვა. 
მსოფლიო მმართველობის გრძელვადიანი კვლევა 1996-2014 წლების პერიოდს მოიცავს. 200 ქვეყანას შორის, სადაც კვლევის მიხედვით მმართველობის 6 ჯამური ინდიკატორია მოცემული, საქართველოს პოზიციები მნიშვნელოვნად გაუმჯობესებულია. შეფასების ინდიკატორებია - გამოხატვის უფლება და ანგარიშვალდებულება; პოლიტიკური სტაბილურობა და ძალადობის/ტერორიზმის არარსებობა; მთავრობის ეფექტიანობა; რეგულაციების ხარისხი; კანონის უზენაესობა; კორუფციის კონტროლი. 
მმართველობის ექვსივე მაჩვენებლიდან კიდევ ერთხელ დასტურდება საქართველოს მთავრობის სწორი პოლიტიკა ბოლო წლების განმავლობაში რაც, გარდა ამ კვლევისა, ასახულია სხვა ავტორიტეტულ რეიტინგებშიც.