საქართველოს პრემიერ-მინისტრი ტოგოს რესპუბლიკისა და გაიანას პრეზიდენტებს შეხვდა. როგორც "ინტერპრესნიუსს" საქართველოს მთავრობის ადმინისტრაციის პრესსამსახურიდან აცნობეს, ირაკლი ღარიბაშვილმა ტოგოს რესპუბლიკის პრეზიდენტს ფორ ესოზიმნა გნასინგბეს არაღიარების პოლიტიკისთვის, ასევე დევნილთა და იძულებით გადაადგილებულ პირთა შესახებ რეზოლუციის მხარდაჭერისთვის მადლობა გადაუხადა.
შეხვედრას, რომელიც გაერო-ს გენერალური ასამბლეის ფარგლებში გაიმართა, საქართველოს ვიცე-პრემიერი, საგარეო საქმეთა მინისტრი გიორგი კვირიკაშვილი დაეწრო.
ამასთან, საქართველოს პრემიერ-მინისტრი გაიანას პრეზიდენტს შეხვდა. მხარეებმა ორი ქვეყნის ურთიერთობების საკითხებზე ისაუბრეს.
შეხვედრაზე დავიდ არტურ გრეინჯერმა კიდევ ერთხელ გამოხატა გაიანას ურყევი მხარდაჭერა საქართველოს სუვერენიტეტისა და ტერიტორიული მთლიანობისადმი, რისთვისაც საქართველოს პრემიერ-მინისტრმა მას მადლობა გადაუხადა.
მხარეებმა განიხილეს საქართველოსა და გაიანას შორის ურთიერთობების გაღრმავების პერსპეტივები, მათ შორის, პოლიტიკურ და სავაჭრო-ეკონომიკურ სფეროებში თანამშრომლობის განვითარების შესაძლებლობები.
