საქართველოს ვიცე-პრემიერი, საგარეო საქმეთა მინისტრი გიორგი კვირიკაშვილი საფრანგეთში სამუშაო ვიზიტის ფარგლებში ფრანგ კოლეგა ლორან ფაბიუსს შეხვდა.
საფრანგეთის რესპუბლიკის საგარეო საქმეთა და საერთაშორისო განვითარების მინისტრთან ლორან ფაბიუსთან შეხვედრისას ხაზი გაესვა ორ ქვეყანას შორის ბოლო პერიოდში გააქტიურებულ მეგობრულ და პარტნიორულ ურთიერთობას.
როგორც "პირWელს" საგარეო საქმეთა სამინისტროდან აცნობეს, შეხვედრაზე ხაზი გაესვა ევროპული და ევრო-ატლანტიკური ინტეგრაციის პროცესისადმი საფრანგეთის მხრიდან შემდგომი მხარდაჭერის მნიშვნელობას, ასოცირების შეთანხმების ეფექტურ იმპლემენტაციისა და ვიზა ლიბერალიზაციის პროცესში.
„საფრანგეთის საგარეო საქმეთა მინისტრთან იყო მრავალმხრივი დიალოგი ყველა იმ მნიშვნელოვან საკითხზე, რაც ჩვენ გვაერთიანებს, მათ შორის, ვიზალიბერალიზაციის საკითხზე საუბრისას, ჩვენ მივიტანეთ მთავარი გზავნილი, რომ საქართველომ მთლიანად შეასრულა საშინაო დავალება, რაც დაკავშირებული იყო ამ პროცესთან, ასევე, მიგრანტების პრობლემამ, რაც არის ახლა ევროპაში და გამომდინარე ახლო აღმოსავლეთის კრიზისიდან, არ უნდა იმოქმედოს ვიზა ლიბერალიზაციის პროცესზე. აღსანიშნავია, რომ საფრანგეთის საგარეო საქმეთა მინისტრმა დადებითად მიიღო ეს გზავნილი. მან, ასევე, დადებითი შეფასება მისცა იმ რეფორმებს, რაც საქართველომ გაატარა ვიზა ლიბერალიზაცის მიმართულებით“ - აღნიშნა შეხვედრის დასრულების შემდგომ გიორგი კვირიკაშვილმა.
მხარეებმა ასევე რეგიონული და საერთაშორისო უსაფრთხოების საკითხები, საქართველო-რუსეთის ურთიერთობები, ოკუპირებულ ტერიტორიაზე არსებული ვითარება და ჟენევის მოლაპარაკებათა მიმდინარეობის პროცესი განიხილეს.
ვიცე-პრემიერმა მადლობა გადაუხადა ლორან ფაბიუსს საფრანგეთის მთავრობის მხრიდან საქართველოს სუვერენიტეტისა და ტერიტორიული მთლიანობის მხარდაჭერისათვის, ასევე, არაღიარების პოლიტიკის გატარებისთვის. ფრანგმა მინისტრმა, თავის მხრივ, დადებითად შეაფასა მსოფლიოში უსაფრთხოების უზრუნველყოფის საქმეში საქართველოს მიერ გაწეული კონტრიბუცია და საერთაშორისო სამშვიდობო მისიებში აქტიური ჩართულობა.
შეხვედრაზე განსაკუთრებული ყურადღება დაეთმო თავდაცვის სფეროში არსებულ თანამშრომლობას.
მინისტრებმა ისაუბრეს სავაჭრო-ეკონომიკური კუთხით არსებულ ურთიერთობებსა და სამომავლო პერსპექტივებზე.
„საფრანგეთის საგარეო საქმეთა მინისტრის მხრიდან მკაფიო გზავნილი იყო, რომ საფრანგეთი გაცილებით მეტ პოტენციალს ხედავს ორ ქვეყანას შორის ეკონომიკური თანამშრომლობის გაღრმავების თვალსაზრისით“, - განაცხადა კვირიკაშვილმა.
ამ კონტექსტში მინისტრებმა ისაუბრეს საფრანგეთის განვითარების სააგენტოსთან შემდგომ თანამშრომლობასა და ახლო მომავალში, საქართველოში სააგენტოს ოფისის გახსნის შესაძლებლობაზე, რაც ხელს შეუწყობს ეკონომიკური პოტენციალის სრულად ათვისებას და სხვადასხვა ბიზნეს-პროექტების განხორციელებას.
საქართველოს ვიცე-პრემიერის საფრანგეთში სამუშაო ვიზიტი ორ ქვეყანას შორის ჩამოყალიბებული მჭიდრო ურთიერთობების კიდევ ერთი მკაფიო გამოხატულებაა.
