საქართველოს პრეზიდენტის მიდგომა, რომ პარლამენტში წარდგენილ საკონსტიტუციო ცვლილებებთან დაკავშირებით საკონსტიტუციო კომისიამ საკუთარი პოზიცია დააფიქსიროს, არის სწორი, - ამის შესახებ "ინტერპრესნიუსს" საკონსტიტუციო კომისიის ადგილობრივი თვითმმართველობისა და ტერიტორიული მოწყობის ჯგუფის ხელმძღვანელმა, ლევან ბოძაშვილმა განუცხადა. 
მისივე განმარტებით, თავად პროცესისთვის იქნება უკეთესი, თუკი საკონსტიტუციო ცვლილებებთან დაკავშირებით პარლამენტის მიერვე შექმნილი შესაბამისი კოლეგიალური ორგანოს მოსაზრება არ იქნება უგულვებელყოფილი.

"პრეზიდენტის მხრიდან ეს არის სწორი მიდგომა, რადგან ამ შემთხვევაში ის გამოდის, როგორც ინსტიტუტების დაცვის ყველაზე მნიშვნელოვანი გარანტორი. პარლამენტმა რატომღაც იჩქარა, თუმცა იმედი მაქვს, რომ ეს საკითხი საკონსტიტუციო კომისიას დაუბრუნდება განსახილველად, ყოველ შემთხვევაში მსჯელობისთვის, აზრის დასაფიქსირებლად მაინც. ვფიქრობ, ჯერ კიდევ არსებობს ამისთვის დრო და კარგი იქნება, თუ საკონსტიტუციო კომისია შესაბამის ჯგუფებში, ან, მითუმეტეს, პლენარულ სხდომაზე იმსჯელებს საკონსტიტუციო ცვლილებებზე. მოგეხსენებათ, საკონსტიტუციო კომისია არის პარლამენტის დადგენილებით შექმნილი და მის დებულებაში პირდაპირ წერია, რომ კონსტიტუციური ცვლილებები და გადასინჯვასთან დაკავშირებული საკითხები უნდა განიხილებოდეს ამ კომისიაში. ეს კარგი იქნება თავად პროცესისთვის, თორემ პარლამენტი ფორმალურად არ არის შეზღუდული, თუ არ ჩავთვლით 2013 წლის 4 ოქტომბერს მისსავე მიერ მიღებულ დადგენილებას, რომლითაც საკონსტიტუციო კომისია შეიქმნა. 

ერთი სიტყვით, პრეზიდენტის პოზიცია არის სწორი. თუ ჩვენ კონსტიტუციაში ვცვლით რაიმეს და ამ დროს არსებობს საკონსტიტუციო კომისია, მისი აზრის, როგორც პარლამენტის მიერ შექმნილი კოლეგიალური ორგანოსი, არ უნდა იყოს უგულვებელყოფილი, მით უმეტეს, რომ კომისიაში თავმოყრილია კონსტიტუციონალისტთა უმეტესობა", - განაცხადა ლევან ბოძაშვილმა.

საქართველოს პრეზიდენტი გიორგი მარგველაშვილი სახელმწიფო საკონსტიტუციო კომისიას მიმართავს, პარლამენტში წარდგენილ საკონსტიტუციო ცვლილებებთან დაკავშირებით პოზიცია დააფიქსიროს. 
"როგორც საზოგადოებისთვის ცნობილია, პარლამენტში დეპუტატთა 50%-ზე მეტმა ხელი მოაწერა წინადადებას საქართველოს კონსტიტუციაში ცვლილებების ინიცირების შესახებ. მინდა საზოგადოებას განვუმარტო, რომ ეს არის ჩვენს უზენაეს კანონში შესატანი და შესაბამისად, ქვეყნისთვის უმნიშვნელოვანესი ცვლილებები. ამავე დროს, მინდა საზოგადოებას შევახსენო, რომ ქვეყანაში საკონსტიტუციო კომისია ფუნქციონირებს. ამასთან დაკავშირებით სახელმწიფო საკონსტიტუციო კომისიას მინდა თხოვნით მივმართო, ამ უმნიშვნელოვანეს ცვლილებებთან დაკავშირებით თავისი პოზიცია დააფიქსიროს. ვფიქრობ, ეს მნიშვნელოვანია კონსტიტუციონალიზმის კიდევ უფრო გაღმავების თვალსაზრისით", - განაცხადა გიორგი მარგველაშვილმა. 

პარლამენტში მმართველ კოალიციაში შემავალი 81 დეპუტიტის ხელმოწერით წარდგენილია საკონსტიტუციო ცვლილებების პროექტი, რომელიც საარჩევნო რეფორმას ეხება. 

პროექტი საპარლამენტო არჩევნების პროპორციული საარჩევნო სისტემით, მრავალმანდატიანი ოლქების მიხედვით ჩატარებას ითვალისწინებს. ამავე ცვლილებებით დაგეგმილია საარჩევნო ზღვარის 5%-დან 4%-მდე შემცირება. გარდა ამისა, პროექტის მიხედვით, ის საკონსტიტუციო ნორმა უქმდება, რომელიც არჩევნებში დაბალი შედეგის მქონე, ბარიერგადალახულ სუბიექტს პარლამენტში ფრაქციის შექმნის მიზნით, მანდატების ფრაქციის შექმნისთვის საჭირო მინიმალურ ოდენობამდე შევსების შესაძლებლობას აძლევს. 

კონსტიტუციაში დაგეგმილი ცვლილებების ამოქმედება, მისი მიღების შემთხვევაში, 2016 წლის შემდგომი არჩევნებისთვის უნდა მოხდეს.