26-27 აგვისტოს საქართველოს ორდღიანი ოფიციალური ვიზიტით ნატო-ს გენერალური მდივანი იენს სტოლტენბერგი ეწვევა.
საგარეო საქმეთა სამინისტროს ინფორმაციით, იენს სტოლტენბერგი თბილისის საერთაშორისო აეროპორტში ხვალ 20:00 საათისთვის ჩამოვა.
რაც შეეხება ოფიციალურ შეხვედრებს, ცნობილია, რომ 27 აგვისტოს, 08:30 საათზე ნატო-ს გენერალური მდივანი შეხვედრას საგარეო საქმეთა სამინისტროში მინისტრ თამარ ბერუჩაშვილთან გამართავს.
27 აგვისტოს ნატო-ს გენერალური მდივანი იენს სტოლტენბერგი ეროვნულ სასწავლო ცენტრ „კრწანისის“ ტერიტორიაზე ნატო-საქართველოს ერთობლივი წვრთნისა და შეფასების ცენტრს გახსნის. ალიანსის გენერალური მდივანი საქართველოს შეიარაღებული ძალების იმ ასეულსაც შეხვდება, რომელიც ნატოს სწრაფი რეაგირების ძალებისთვის გადამზადდა.
27 აგვისტოს, 15:30 საათზე ნატო-ს გენერალური მდივანი საქართველოს პარლამენტის თავმჯდომარეს, დავით უსუფაშვილს შეხვდება.
ამავე დღეს, 27 აგვისტოს 16:45 საათზე იენს სტოლტენბერგი შეხვედრას გამართავს საქართველოს პრეზიდენტთან, გიორგი მარგველაშვილთან, 17:15 საათზე კი მათი ერთობლივი პრესკონფერენცია გაიმართება.
დაგეგმილია მისი შეხვედრა პრემიერ-მინისტრ ირაკლი ღარიბაშვილთან და აღმასრულებელი ხელისუფლების სხვა წარმომადგენლებთან.
გენერალური მდივანი პატივს მიაგებს საქართველოს ერთიანობისთვის დაღუპული მებრძოლების ხსოვნას და გვირგვინით შეამკობს გმირთა მემორიალს.
ოფიციალური შეხვედრების ფარგლებში განიხილება საქართველოს ნატო-ში გაწევრიანების პროცესთან დაკავშირებულ საკითხთა სრული სპექტრი და ამ მიმართულებით დაგეგმილი შემდგომი ნაბიჯები, უელსის სამიტზე მიღებული არსებითი პაკეტის იმპლემენტაციის მიმდინარეობა და ვარშავის 2016 წლის ნატო-ს სამიტისთვის მზადების პროცესი.
აღსანიშნავია, რომ ნატო-ს გენ-მდივნის რანგში, ეს იანს სტოლტენბერგის პირველი ოფიციალური ვიზიტია საქართველოში.
