რუსეთთან ურთიერთობების საკითხებში პრემიერ-მინისტრის სპეციალური წარმომადგენელი ზურაბ აბაშიძე აცხადებს, რომ საქართველოს ხელისუფლება კვლავაც გააგრძელებს რუსეთთან პრაგმატულ პოლიტიკას და "ნერვებთან დაკავშირებით არანაირი პრობლემა არ ექნება". 

ამის შესახებ ზურაბ აბაძიძემ "ინტერპრესნიუს" ნატო-ს გენერალური მდივნის სპეციალური წარმომადგენლის, ჯეიმს აპატურაის იმ განცხადების კომენტირებისას განუცხადა, რომელიც ე.წ. აბაშიძე-კარასინის ფორმატის შენარჩუნებას ეხებოდა.

აბაშიძის განმარტებით, ის რომ, საქართველოს დასავლელი პარტნიორები მხარს უჭერენ ქართულ-რუსული დიალოგის გაგრძელებას, საზოგადოებისთვის კარგადაა ცნობილი, ამის შესახებ არაერთხელ თქმულა ნატო-ს, აშშ-ის ადმინისტრაციის, ევროპელი მეგობრებისგანაც და ეს პოზიცია ჯეიმს აპატურაიმ საზოგადოებრივ მაუწყებლისთვის მიცემულ ინტერვიუში კვლავ არგუმენტირებულად დაადასტურა. 
მისივე თქმით, თითქმის ყოველდღიურად აქვს კონსულტაციები პარტნიორებთან და მათი მხრიდან სრულ მხარდაჭერას გრძნობს. 

"ჩვენს პარტნიორებს კარგად ესმით, რომ დიალოგს, რაოდენ რთულიც არ უნდა იყოს იგი, ალტერნატივა არ აქვს. ამავდროულად, ისინი ცდილობენ, აგვაცილონ ახალი სირთულეები და საფრთხეები. ანუ, ისინი უფრთხილდებიან ჩვენს ქვეყანას, მის უსაფრთხოებასა და რეგიონის სტაბილურობას",-აღნიშნა ზურაბ აბაშიძემ. 

ზურაბ აბაშიძის აზრით, სამწუხაროდ თუ საუბედუროდ, ხელისუფლების ოპონენტების ერთი ნაწილი სულ სხვა ამოცანებს ისახავა. მათი მიზანია, რამენაირად უბიძგონ ხელისუფლებას, ჩაიდინოს რუსეთთან მიმართებაში ისეთივე ფატალური შეცდომები, რომლებიც წინა ხელისუფლებამ დაუშვა და, რომლებმაც ფაქტობრივად იმსხვერპლა 2008 წელს საქართველო. 

"აი, ეს არის რეალური მიზეზი იმისა, თუ რატომ არ იზიარებენ მავანნი ჩვენი დასავლელი პარტნიორების შთაგონებებს, რომ უნდა გავაგრძელოთ რთული დიალოგი რუსეთთან, ვეძებოთ შეხების წერტილები, შევამციროთ ახალი კონფლიქტისა და ძალადობის ალბათობა. პრინციპში, ჩვენმა ოპონენტებმა ისედაც, შთაგონების გარეშეც ყველაფერი შესანიშნავად იციან და 2008 წლის უბედურების შემდეგ თვითონ ყოველნაირად ცდილობდენ, დაემყარებინათ მოსკოვთან პირდაპირი დიალოგი. აბა, ტყუილად ხომ არ შესთავაზებდნენ რუსეთის მხარეს 2008 წლის ნოემბერში მოსკოვში საქართველოს კულტურის დეკადის ჩატარებას? იციან, რომ დიალოგი საჭიროა, მაგრამ წინ არჩევნებია და იქნებ რამენაირად უმტყუნოს ხელისუფლებას ნერვებმა და დაუშვას გამოუსწორებელი შეცდომა. ეს არის მათი მთავარი გათვლა და ამოცანა", - აღნიშნავს ზურაბ აბაშიძე.

როგროც პრემიერ-მინსიტრის სპეცილაური წარმომადგენლეი ამბობს, რა თქმა უნდა, შორსაა იმ აზრისაგან, რომ ხელისუფლების ყველა ოპონენტს ასეთი არაკეთილსინდისიერი ზრახვები აქვს, წინა ხელისუფლებაშიც არიან გამოცდილი და რეალისტურად მოაზროვნე ადამიანები, რომლებიც ამ მხრივ ნაკლებად აქტიურებენ და რაციონალურად უდგებიან ჩვენს ჩრდილოელ მეზობელთან ურთიერთობას. თუმცა, მათი პოზიცია სრულებით იკარგება იმ კაკაფონიაში, რომელიც თითქმის ყოველდღიურად გვესმის. 

"მინდა ხაზგასმით ავღნიშნო, რომ საქართველოს ხელისუფლება კვლავაც გააგრძელებს რუსეთთა პრაგმატულ პოლიტიკას და ნერვებთან დაკავშირებით არანაირი პრობლემა არ ექნება,"- დასძინა "ინტერპრესნიუსთან" საუბარში რუსეთთან ურთიერთობების საკითხებში პრემიერ-მინისტრის სპეციალურმა წარმომადგენელმა ზურაბ აბაშიძემ. 

ჯეიმს აპატურაის ინტერვიუ "შაზოგადოებრივმა მაუწყებელმა" ჩაწერა. კითხვაზე, როგორ უყურებს ნატო აბაშიძე-კარასინის ფორმატს და რამდენად ხშირია კონტაქტი ალიანსსა და საქართველოს ხელისუფლებას შორის რუსეთთან ურთიერთობასთან დაკავშირებულ საკითხებზე, აპატურაიმ განაცხადა, რომ დიდი ინტერესით ეცნობიან ქართული მხარისგან მიღებულ ინფორმაციებს. 

"ჩვენ დიდი ინტერესით ვეცნობით იმ ინფორმაციებს, რომელსაც ჩვენი მეგობრები გვიგზავნიან დაწყებული პრეზიდენტით, პრემიერ-მინისტრით, მინისტრებით, ელჩით... დიალოგის ყველა მიმართულებით გვაწვდიან უახლეს ინფორმაციას. დარწმუნებული ვარ, ამ საკითხს გენერალური მდივანი განიხილავს თბილისშიც. გენერალური მდივანი უსაფრთხოების საკითხებთან კავშირში მყოფ თითქმის მთელ პოლიტიკურ ისტებლიშმენტს შეხვდება. მე ასევე დარწმუნებული ვარ, გენმდივანი მოუწოდებს საქართველოს, რომ ეს გზა გაარძელოს", - განაცხადა აპატურაიმ.

რაც შეეხება კარასინი - აბაშიძის შეხვედრების ფორმატს, აპატურაის განცხადებით, ჩრდილოატლანტიკურ ალიანსში ყველა იზიარებს იმ აზრს, რომ დიალოგი არის საუკეთესო გზა და ალტერნატივა არ აქვს, "თუნდაც იმ შემთხვევაში, რომ ამ ეტაპზე წინსვლას ვერ ვხედავთ, მაგრამ შესაძლოა დიალოგი გახდეს წინაპირობა იმის, რომ თავიდან იქნას აცილებული ნეგატიური პროცესები". 

"ძალიან რთულია იმის თქმა, ამ დიალოგით პროცესი უკან მიდის თუ არა. მაგრამ აქ მთავარია, რომ მცდელობა ყველაფრის, რასაც საქართველოს ამჟამინდელი მთავრობა აკეთებს და გულახდილად რომ ვთქვათ, აკეთებდა და სურდა ყოფილ ხელისუფლებას, არის ერთადერთი ლოგიკური გზა. ალიანსი გააგრძელებს დიალოგის მხარდაჭერას. თუ საქართველო გადაწყვეტს, რომ ეს ფორმატი უშედეგოა, არ არის პროდუქტიული, ზიანის მომტანია და აუცილებელია შეწყვეტა, ეს საქართველოს არჩევანი იქნება და ჩვენ დავინტერესდებით, თუ რა ლოგიკა იქნება ამ გადაწყვეტილების უკან. მაგრამ ახლა, ამ დროისთვის, ალიანსის წევრებს შორის კონსესუსია თემაზე, მიდგომაზე - ვცადოთ ყველაფერი, თუნდაც იმ შემთხვევაში, როდესაც ხელშესახები შედეგი არ გვაქვს, მაგრამ შესაძლოა მოვლენების ნეგატიურად განვითარება აგვაცილოს", - განაცხადა ჯეიმს აპატურაიმ.