საქართველოს პრეზიდენტი პრემიერ-მინისტრ ირაკლი ღარიბაშვილის მიერ ლევან ბობოხიძის ძმის შეწყალებასთან დაკავშირებით გაკეთებული განცხადებას, რომ "ჩვენ გვყავს ჭეშმარიტად "ნაციონალური" პრეზიდენტი", ნაჩქარევად და ემოციურად აფასებს.
"მე ვფიქრობ, რომ არის ხოლმე ნაჩქარევი, ემოციური განცხადებები, რომლის პოლიტიკურ შედეგებს ჩვენ ვერ ვიაზრებთ. პრეზიდენტი თავისი უფლებებამოსილების ამ ნაწილში – შეწყალების ნაწილში - უნდა იყოს აბსოლუტურად ზეპარტიული. არ უნდა იყოს ის აქცენტი, თუ ვინ ვისი ძმაა. ჩვენ რაზე ვსაუბრობთ? ჩვენ ვართ საზოგადოება, რომლის წევრებს ჯერ კიდევ ახსოვთ, კანონები, რომლებიც იყო მიღებული მოტივით "Член семьи врага народа". ძალიან ფაქიზად უნდა მოვეპყრათ ამ თემებს", - განაცხადა გიორგი მარგველაშვილმა "მაესტროს ცხრიანში".
მისი თქმით, შეწყალება არის ჰუმანური აქტი, რომელიც გადაცემული აქვს ქვეყანაში ყველაზე ლეგიტიმურ პოლიტიკურ ფიგურას – პრეზიდენტს, რომელსაც არ აქვს უფლება, ჰუმანურობა გამოყენებულ იქნას პარტიული და პოლიტიკური ნიშნით.
რაც შეეხება პრემიერის განცხადების იმ ნაწილს, რომ ის იმედოვნებს, პრეზიდენტი ახალაიას, მერაბიშვილსა და სააკაშვილსაც შეიწყალებს, მარგველაშვილის თქმით, უჭირს ამ არასერიოზული განცხადების სიღრმისეულად კომენტირება. პრეზიდენტის თქმით, მეტი სინათლე უნდა შევიტანოთ საზოგადოებასთან ურთიერთობაში და უფრო პროფესიულად ვეკამათოთ ერთმანეთს.
