სასაზღვრო ზოლთან ვიზიტით გვინდა იმის დემონსტრირება, რომ ჩვენ მხარს ვუჭერთ საქართველოს და არ ვაღიარებთ რუსეთის ოკუპაციის პოლიტიკას, - ამის შესახებ ჟურნალისტებს საქართველოს საგარეო საქმეთა სამინისტროში გამართული შეხვედრის შემდეგ ევროპარლამენტის საგარეო საქმეთა კომიტეტის თავმჯდომარე ელმარ ბროკიმ განუცხადა.
რაც შეეხება ევროკავშირთან ურთიერთობებს, ბროკის შეფასებით, საქართველოს ამ გზაზე პროგრესი აქვს.
"პროგრესი, რომელიც საქართველომ აჩვენა ევროკავშირისკენ მიმავალ გზაზე, ძალიან პოზიტიურია. რაც შეეხება საქართველოს ტერიტორიული მთლიანობისა და სუვერენიტეტის საკითხს, ჩვენ არ ვაღიარებთ სხვა ქვეყნის მიერ თქვენ ოკუპირებულ ტერიტორიებს. სასაზღვრო ზოლთან ვიზიტით გვინდა სწორედ იმის დემონსტრირება, რომ ჩვენ საქართველოს ვუჭერთ მხარს და რუსეთის ოკუპაციის პოლიტიკას არ ვაღიარებთ", - განაცხადა ელმარ ბროკიმ.
საქართველოს ევროპარლამენტის საგარეო საქმეთა კომიტეტის წარმომადგენლები სტუმრობენ. დელეგაციას ევროპარლამენტის საგარეო საქმეთა კომიტეტის თავმჯდომარე ელმარ ბროკი ხელმძღვანელობს.
დელეგაციის წევრებმა ვიზიტის ფარგლებში პირველი შეხვვედრა საქართველოს საგარეო საქმეთა სამინისტროში გამართეს.
ვიზიტის ფარგლებში ევროპარლამენტის საგარეო საქმეთა კომიტეტის წარმომადგენლები საქართველოს აღმასრულებელი და საკანონმდებლო ხელისუფლების სხვა წარმომადგენლებსაც შეხვდებიან. ამასთან, დაგეგმილია შეხვედრები სამოქალაქო საზოგადოებასა და საპარლამენტო უმცირესობასთან. ევროპარლამენტარები დღესვე საოკუპაციო ხაზს მოინახულებენ და სოფელ ხურვალეთს ეწვევიან.
