მუნიციპალიტეტების მიერ სავალდებულოდ გამოსაქვეყნებელ ინფორმაციათა ნუსხა იზრდება. ამას "ადგილობრივი თვითმმართველობის კოდექსში" დაგეგმილი ცვლილებების პროექტი ითვალისწინებს, რომელიც პარლამენტს განსახილველად მთავრობამ წარუდგინა.
მუნიციპალიტეტის ორგანოები ვალდებულინი არიან, გამოაქვეყნონ მიღებული ადმინისტრაციულ-სამართლებრივი აქტები, მათი პროექტები და სხვა საჯარო ინფორმაცია.
გარდა ამისა, მუნიციპალიტეტის ორგანოები, აგრეთვე, ვალდებულნი იქნებიან გამოაქვეყნონ: მუნიციპალიტეტის საკრებულოს, მუნიციპალიტეტის საკრებულოს კომისიის და მუნიციპალიტეტის საკრებულოს ბიუროს, მთავრობის სხდომების ოქმები, მათი გამართვიდან 10 დღის ვადაში; სამოქალაქო მრჩეველთა საბჭოს სხდომების ოქმები, მათი გამართვიდან 10 დღის ვადაში; დასახლების საერთო კრების ოქმები, გამგეობის/მერიის მიერ დასახლების საერთო კრების სხდომის ოქმის ან მისი ასლის მიღებიდან არაუგვიანეს 10 დღისა; ინფორმაცია დასახლების საერთო კრების დღის წესრიგის, ჩატარების თარიღის, დროისა და ადგილის შესახებ; საანგარიშო წლის ბიუჯეტის შესრულების ანგარიში, მუნიციპალიტეტის საკრებულოში წარდგენიდან 10 დღის ვადაში; მუნიციპალიტეტის ბიუჯეტის პროექტი; მუნიციპალიტეტის საპრივატიზებო ობიექტების ნუსხა, მუნიციპალიტეტის საკრებულოს მიერ მისი დამტკიცებიდან 10 დღის ვადაში; მუნიციპალიტეტის ქონების პრივატიზების გეგმა, დამტკიცებიდან 10 დღის ვადაში; გამგებლის/მერის და მუნიციპალიტეტის საკრებულოს წევრის მიერ გაწეული მუშაობის შესახებ, ამ კანონით გათვალისწინებული ანგარიშები, მათი წარდგენიდან 10 დღის ვადაში; პეტიცია, რეგისტრაციიდან 10 დღის ვადაში; წერილობითი ინიციატივა გამგებლისთვის/მერისთვის უნდობლობის გამოცხადების შესახებ, მისი რეგისტრაციიდან 10 დღის ვადაში.
პარლამენტში ინიცირებული პროექტის მიხედვით, ჩამოთვლილი საკითხები ქვეყნდება "ზოგადი ადმინისტრაციული კოდექსის" შესაბამისად, ან ქვეყნდება პროაქტიულად.