ქართულმა კლუბებმა ევროპის ლიგის პირველი საკვალიფიკაციო ეტაპის მატჩებში წაუგებლად ითამაშეს.
თბილისის "დინამომ" "დინამო არენაზე" აზერბაიჯანული გაბალა 2:1 დაამარცხა. მიუხედავად იმისა, რომ "დინამოს" 51-ე წუთზე მსაჯმა ფეხბურთელი გაუძევა, ქართულმა გუნდმა წარმატებას მაინც მიაღწია. ანგარიში 65-ე წუთზე ჯაბა ჯიღაურმა გახსნა, 74-ე წუთზე ჯავით ჰუსეინოვმა გაათანაბრა, საბოლოო ანგარიში კი 84-ე წუთზე გიორგი პაპუნაშვილმა დააფიქსირა.
გამარჯვებით დაიწყო საკვალიფიკაციო ეტაპი ბათუმის "დინამომაც". "დინამომ" კვიპროსულ "ომონიას" ზესტაფონში უმასპინძლა და ანგარიშით 1:0 დაამარცხა. აღსანიშნავია, რომ ამ წყვილში ფეხბურთის სპეციალისტები აშკარა ფავორიტად კვიპროსულ გუნდს მიიჩნევენ. შეხვედრაში ერთადერთი გოლი 40-ე წუთზე გიორგი გაბედავამ საჯარიმო დარტყმიდან გაიტანა.
პირველად მონაწილეობს ევროტურნირებზე ცხინვალის "ცხინვალი". კახა კაჭარავას გუნდი სტუმრად რუმინულ "ბოტოშანს" შეხვდა და ფრედ, 1:1 ითამაშა. 21-ე წუთზე ანგარიში პეტრე- დანიელ ივანოვიჩმა გახსნა, თუმცა მეორე ტაიმის დასაწყისში, 46-ე წუთზე ნიკა კაჭარავამ გაათანაბრა.
განმეორებითი შეხვედრები ერთ კვირაში გაიმართება. თბილისის "დინამო" და ბათუმის "დინამო" სტუმრად ითამაშებენ, ხოლო "ცხინვალი" მეტოქეს შინ უმასპინძლებს.