გორის რაიონის სოფელ რეხში მტაცებელ ცხოველს ეძებენ. როგორც "ინტერპრესნიუსის" კორესპონდენტი სოფლიდან იუწყება, ადგილზე სპეცდანიშნულების რაზმის და სხვა შესაბამისი სამსახურების წარმომადგენლები მუშაობენ.
მტაცებლის საძიებო სამუშაოები რეხში ერთ-ერთი ადგილობრივი მოქალაქის მიერ 112-ში განხორციელებული შეტყობინების საფუძველზე დაიწყო. სოფლის აღნიშნული მკვიდრის მტკიცებით, რეხის განაპირას მტაცებელი ცხოველის ნაკვალევი აღმოაჩინეს. ასევე შენიშნეს პირუტყვის დაფრთხობა.
წუხელ, 21:00 საათიდან დღეს დილის 09:00 საათამდე მტაცებლის შესახებ 112-ზე 30 შეტყობინება შევიდა. ყველა შემთხვევაში მოხდა შესაბამისი სამსახურების ადგილზე გასვლა, თუმცა არც ერთი არ დადასტურდა.
ამ დროისთვის არსებული ინფორმაციით, ზოოპარკიდან გაქცეული ერთი ვეფხვისა და ერთი ზოლიანი აფთარის ძებნა მიმდინარეობს.
