პარლამენტის თავმჯდომარემ კომიტეტებს მშენებლობის და სხვადასხვა ინფრასტრუქტურული პროექტების განხორციელების კუთხით არსებული კანონებისა და წესების სრულყოფილების შესწავლა დაავალა.
როგორც უსუფაშვილმა პარლამენტის ბიუროს სხდომაზე განაცხადა, ამის გაკეთება მსგავსი ტრაგედიების თავიდან აცილების მიზნით არის აუცილებელი.
"დღეს ჩვენ მოქალაქეებს აქვს კითხვა იმის თაობაზე, როგორ შეიძლება მსგავსი სიტუაციების შედეგად მიყენებული ზარალის მინიმუმადე დაყვანა. სტიქია ისეთი მოვლენაა, რომლის ბოლომდე არც პრევენცია შეიძლება და არც იმის გარანტირება, რომ არასდროს ამა თუ ქალაქს თუ სოფელს არანაირი ზიანი არ მიადგება, მაგრამ ის, თუ რა უნდა გავითვალისწინოთ, რა უნდა გავაკეთოთ უკეთ, რათა ასეთი ტრაგედიები მინიმუმადე შემცირდეს, ამაზე გვმართებს მსჯელობა. ამაზე დღეს ყველა საუბრობს. სათანადო სამინისტროები და უწყებები არიან ჩართული, მაგრამ ჩვენ, პარლამენტს ძალიან სერიოზული როლი გვაკისრია. ხალხმა იმისთვის აგვირჩია, რომ მათ ვემსახუროთ და ჩვენს მიერ მიღებული კანონები, არსებული წესები, რეჟიმი მშენებლობის თუ სხვადასხვა ინფრასტრუქტურული პროექტების რამდენად არის სრულყოფილად წინასწარ შესწავლილი, გაანალიზებული. ამაზე სათანადო კომიტეტმა იმუშაონ და უახლოეს ხანებში მოისმინონ მთავრობის ანგარიშები, ექსპერტების მოსაზრებები", - განაცხადა უსუფაშვილმა პარლამენტის ბიუროს სხდომაზე.
მან აქვე აღნიშნა, რომ ხალხს უნდა ჰქონდეს განცდა იმისა, რომ უსაფრთხო გარემოში ცხოვრობს.
