"თავისუფალმა დემოკრატებმა" პარტიის ეკონომიკური ხედვის პრეზენტაცია გამართეს. პრეზენტაციას ეროვნულ ბიბლიოთეკაში დიპლომატიური კორპუსის წარმომადგენლები და ეკონომიკური პროფილის ექსპერტები ესწრებოდნენ.

"თავისუფალი დემოკრატების" ეკონომიკური ხედვის ძირითადი პრინციპია სწრაფი ეკონომიკური ზრდა, კერძოდ, "თავისუფალი დემოკრატები" ამოცანად ისახავენ 2016-2020 წლებში 3-6%-იანი ინფლაციის პირობებში საქართველოს მთლიანი შიდა პროდუქტის ზრდა 7-9%-ს შეადგენდეს, ასევე მონეტარული სტაბილურობის პირობებში ერთ სულ მოსახლეზე მშპ 6 500 ლარიდან 12 000 ლარამდე გაიზარდოს.

გარდა ამისა, დოკუმენტში საუბარია ძლიერი საშუალო ფენის რაოდენობის გაორმაგებაზე და მცირე და საშუალო ბიზნესისთვის მნიშვნელოვანი საგადასახადო შეღავათების დაწესებაზე. კერძოდ, "თავისუფალი დემოკრატების" პროგრამით, გაიზრდება ფიქსირებული გადასახადის მქონე მცირე ბიზნესების რიცხვი, საქმიანობის სახეების გაფართოების საფუძველზე. ასევე "თავისუფალი დემოკრატები" გეგმავენ ბიზნესში რეინვესტირებული კაპიტალის გათავისუფლებას მოგების გადასახადისგან, საგადასახადო სისტემის ადმინისტრირების რეორგანიზაციას, მათ შორის ფინანსთა სამინისტროს საგამოძიებო სამსახურის გაუქმებას, საქართველოს მთელ ტერიტორიაზე 3 წლის განმავლობაში იურიდიული კადასტრის განხორციელებას მიწის აღწერით და საკუთრების უფლების დარეგისტრირებით. ასევე ტექნიკური განათლების დონის ამაღლებას, ტექნოლოგიურ ადაპტირებასა და ინოვაციური პოტენციალის განვითარებას.

როგორც "თავისუფალი დემოკრატების" ლიდერმა ირაკლი ალასანიამ განაცხადა, იმისათვის, რომ ქვეყანა იყოს დაცული, განავითაროს თავდაცვა, ენერგოუსაფრთხოება, საზოგადოებრივი უსაფრთხოება, მთავარია ეკონომიკური ზრდა, რომლის გარეშეც სახელმწიფო ვერ განვითარდება.

"ამიტომ ჩვენ ვვარაუდობთ, რომ გვექნება 7-9%-იანი ზრდა 3-6%-იანი ინფლაციის პირობებში, ეს ნიშნავს იმას, რომ ჩვენ რეალურად გავაძლიერებთ და გავზრდით საშუალო ფენას, გადასახადების გადამხდელთა რიცხვს. დღეს ჩვენ წარვადგენთ ეკონომიკურ ხედვას, ხოლო ქვეყნის სტრატეგიული განვითარებისა და სხვა დარგების მომცველი ხედვა და გეგმა უკვე წარდგენილი იქნება შემოდგომაზე, როდესაც დაიწყება წინასაარჩევნო კამპანია", - განაცხადა ალასანიამ.

მისივე თქმით, ის მოხარული იქნება თუკი პარლამენტში "თავისუფალი დემოკრატების" ან თუნდაც ხელისუფლების წარმომადგენელთა ინიციატივით გავა ის ინიციატივები, რომელიც "თავისუფალი დემოკრატების" ეკონომიკურ ხედვაში არის წარმოდგენილი.

"ჩვენ მართლაც გვჭირდება გაიზარდოს ინვესტიციების მოცულობა, რომელიც კატასტროფულად დაეცა და ბოლო 5-6 წლის განმავლობაში ყველაზე დაბალია", - განაცხადა ირაკლი ალასანიამ.