პარლამენტის ბიუროს სხდომაზე ორ ოპოზიციონერ დეპუტატს - ლევან ბეჟაშვილსა და ირაკლი ჩიქოვანს შორის შელაპარაკება მოხდა. ჩიქოვანი ბეჟაშვილის ფრაზამ - "უმრავლესობისადმი ლოალურად განწყობილი საპარლამენტო ჯგუფი" გაანაწყენა.
საქმე გასულ კვირას პარიზში, საარჩევნო საკითხებთან დაკავშირებით, ვენეციის კომისიის ორგანიზებით გამართულ შეხვედრას ეხება.
როგორც ლევან ბეჟაშვილმა ბიუროს სხდომაზე განაცხადა, ვენეციის კომისიამ მოწვევა არა ცალკეული დეპუტატების, არამედ პარლამენტის სახელზე გამოაგზავნა. დელეგაციის შემადგენლობაში კი, ბეჟაშვილის ინფორმაციით, ძირითადად უმრავლესობის წევრები და "უმრავლოსობასთან ლოალურად განწყობილი სხვა საპარლამენტო ჯგუფის წარმომადგენლები" იმყოფებოდნენ. ბეჟაშვილის განმარტებით, "ნაციონალურ მოძრაობას", რომელიც პარლამენტში ერთ-ერთ ყველაზე დიდ ფრაქციას წარმოადგენს, შეხვედრაში მონაწილეობის შესაძლებლობა არ მიეცა. დეპუტატმა დავით უსუფაშვილს სთხოვა, გაერკვია, ვინ დააკომპლექტა დელეგაცია და რატომ არ იყო მის შემადგენლობაში "ნაციონალური მოძრაობის" არც ერთი წევრი.
პარლამენტის თავმჯდომარემდე ბეჟაშვილს ფრაქცია "თავისუფალი დემოკრატების" ხელმძღვანელმა ირაკლი ჩიქოვანმა უპასუხა, რომელიც როგორც გაირკვა, ოპოზიციის ერთადერთი წარმომადგენელი იყო დელეგაციაში და შესაბამისად, ბეჟაშვილის რეპლიკაც "უმრავლესობისადმი ლოალურობის" შესახებ მას ეხებოდა.
მან ბეჟაშვილს მიმართა, რეპლიკების შერჩევისას სხვა სიტყვები გამოიყენოს.
"ხელისუფლებასთან ლოიალურობის კუთხით ჩემი დამოკიდებულება სხვანაირია. ჩვენ თქვენგან განსხვავებით, საარჩევნო სისტემასთან დაკავშირებით ყოველთვის ერთ პოზიციაზე ვიყავით. ამიტომ ვიდრე დამახასიათებდით მე... არ იქნებოდა იმ სიტყვების გამოყენება საჭირო, რომელსაც თქვენ ახლა იყენებთ. კარგად მესმის სიტყვებით მანიპულირების შესაძლებლობა", - მიმართა ბეჟაშვილს ირაკლი ჩიქოვანმა.
თავის მხრივ დავით უსუფაშვილმა აღნიშნა, რომ "ნაციონალური მოძრაობა" დიდი უხერხულობაში აყენებს უმრავლესობას, როდესაც დაგეგმილ ვიზიტებში მონაწილეობაზე უარს ამბობს. პარლამენტის თავმჯდომარის განმარტებით, ბოლო ასეთი შემთხვევა ესტონეთის პრეზიდენტის ვიზიტისას გამართულ შეხვედრაზე იყო, სადაც "ნაციონალური მოძრაობის" წარმომადგენელი არ გამოცხადდა.
"რაც შეეხება ვენეციის კომისიის შეხვედრას, მათი მოთხოვნა პირის მონაწილეობა იყო – სამის უმრავლესობიდან და ერთის – ოპოზიციიდან. სწორედ ასეთი შემადგენლობა გაემგზავრა. გაცილებით ხშირია, როცა "თავისუფალი დემოკრატები" არ არიან დელეგაციაში, სადაც "ნაციონალური მოძრაობის" წარმომადგენლები იმყოფებიან", - განაცხადა დავით უსუფაშვილმა.
