აშშ-ში საქართველოს თავდაცვის მინისტრის თინა ხიდაშელის და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის დავით ბაქრაძის ვიზიტები იგეგმება.
ამის შესახებ "ინტერპრესნიუსს" საქართველოს საგანგებო და სრულუფლებიანმა ელჩმა შეერთებულ შტატებში, არჩილ გეგეშიძემ განუცხადა. მისი თქმით, შეხვედრებზე კიდევ ერთხელ დაფიქსირდება ნატო-ში გაწევრიანების სურვილი და ამ საკითხში მხარდაჭერის გაგრძელების თხოვნა.
"ამჟამად მზადდება საქართველოს ახალი თავდაცვის მინისტრის ვიზიტი, რომლის დროსაც კიდევ ერთხელ გაიჟღერებს ეს თემა. ასევე, ვიწყებთ ევროპული და ევროატლანტიკური ინტეგრაციის საკითხებში სახელმწიფო მინისტრის ვიზიტის მზადებას", - განაცხადა გეგეშიძემ.
მან საქართველო-აშშ-ის ურთიერთობებზე ისაუბრა, რომელიც ელჩის აზრით, საქართველოში ხელისუფლების ცვლილების შემდეგ, ბევრად გაუმჯობესდა.
"შეიძლება დაბეჯითებით ითქვას, რომ ურთიერთობები ბევრად გაუმჯობესდა. ამის მთავარი მიზეზია ხელისუფლების მშვიდობიანი, მოწესრიგებული და დემოკრატიული გადაცემა 2012 წლის ოქტომბერში. ამერიკის ადმინისტრაციის, კონგრესისა და არასამთავრობო ორგანიზაციების გამოხმაურებები დღეს უფრო დადებითია, ვიდრე წინა წლებში. საქართველო-ამერიკის ურთიერთობებმა სტრატეგიული ხასიათი შეინარჩუნა, მაგრამ განვითარდა საზოგადოებებს შორის კავშირებიც - კულტურული, საგანმანათლებლო, ეკონომიკური და საქმიანი ურთიერთობები. დღეს ამერიკა საქართველოს ეპყრობა, როგორც საიმედო და ღირსეულ პარტნიორს. დონორისა და დახმარების მიმღები ქვეყნის ურთიერთობები ბოლო წლებში პარტნიორული ურთიერთობებით იცვლება. ვერ გავიზიარებ კოლეგების თეზისს საქართველოს აშშ-ს რადარებიდან გაქრობის შესახებ. "რადარებიდან გამქრალ" ქვეყანაში აშშ არ ატარებს იმ მასშტაბის ღონისძიებებს, როგორიც ამასწინათ გამართული "ღირსეული პარტნიორის" სახელით წოდებული სამხედრო წვრთნები გახლდათ. ასევე, "რადარებიდან გამქრალ" ქვეყანაში აშშ-ის ჯანდაცვის წამყვანი უწყება, კერძო კომპანიასთან ერთად, არ ახორციელებს საშიში დაავადების აღმოფხვრის მრავალმილიარდიან პროგრამას, არც სენატორები გამოიჩენენ ყველაზე მეტ ინტერესს საკომიტეტო მოსმენის დროს "რადარებიდან გამქრალ" ქვეყანაში დასანიშნი ელჩის მიმართ", - განაცხადა გეგეშიძემ.
