ირაკლი ალასანია ვიდეოდიალოგის ფარგლებში, რომელსაც ის დღეს მართავს და მოსახლეობის შეკითხვებს პასუხობს, ამბობს, რომ ქვეყნისთვის უკეთესი იქნება თუ ივანიშვილი და სააკაშვილი საქართველოს პოლიტიკას თავს დაანებებენ. ეს განცხადება "თავისუფალი დემოკრატების" ლიდერმა იმ კითხვის საპასუხოდ განაცხადა, ისევ ითანამშრომლებს თუ არა ბიძინა ივანიშვილთან, თუ ის პოლიტიკაში დაბრუნების შემთხვევაში კვლავ შესთავაზებს თანამშრომლობას.
"არის გარკვეული პოლიტიკური ურთიერთობები, ადამიანურს რომ თავი დავანებოთ, რომელიც შეიძლება ისე გატყდეს, რომ მისი აღდგენა წარმოუდგენელი იყოს. ასეთი რამე ხშირად არ ხდება, მაგრამ როდესაც ხდება, იცი, რომ ამ პოლიტიკურ ძალასთან საერთო ბრძოლაში შესვლა აღარ მოგინდება. ბიძინა ივანიშვილი ასეთ პოლიტიკურ-საზოგადოებრივ ფიგურას წარმოადგენს ჩემთვის. ეს არ ნიშნავს, რომ ჩვენ არ შეიძლება საერთო მოვძებნოთ ჩვენი ქვეყნის ინტერესებიდან გამომდინარე, მაგრამ რაიმე ფორმით ერთ გუნდში ყოფნა წარმოუდგენლად მიმაჩნია ისევე, როგორც ყოფილ პრეზიდენტ სააკაშვილთან. სააკაშვილიც და ივანიშვილიც ჩემთვის არის წარსული, ისინი პრაქტიკულად ერთმანეთს ასულდგმულებენ, ერთმანეთისთვის არიან ახლა უკვე პოლიტიკაში და არა საქართველოს ინტერესებისთვის. ამიტომ ჩემი გადმოსახედიდან მათი ადგილი არის წარსულში. რა თქმა უნდა, დევნაზე და პოლიტიკურ რეპრესიებზე საუბარი ზედმეტია, უბრალოდ ჩვენ უნდა გავაგრძელოთ წინსვლა და მათ გარეშე სვლაც. საქართველოსთვის უკეთესი იქნება, რომ ერთმაც და მეორემაც საქართველოს პოლიტიკას დაანებონ თავი", - განაცხადა ირაკლი ალასანიამ და დასძინა, რომ ეს მისი პირადი მოსაზრებაა და ივანიშვილმა და სააკაშვილმა თავისი საქმე თავად იციან.
