შსს-ს გენერალური ინსპექცია შეისწავლის, თუ როგორ გადაკვეთა საზღვარი 16 წლის არასრულწლოვანმა, - ამის შესახებ "ინტერპრესნიუსს" შინაგან საქმეთა სამინისტროს პრესსამსახურის უფროსმა ნინო გიორგობიანმა განუცხადა.

"საუბარია 2 პირზე, რომელთაგან ერთი არის 18 წლის ანუ სრულწლოვანი, მას შეეძლო საზღვარი ID ბარათით გადაეკვეთა და ამაში კანონდარღვევა არ არის. რაც შეეხება მეორე პირს, ის 16 წლის იყო, რომელმაც საზღვარი გადაკვეთა და ეს იყო დარღვევა, საპატრულო პოლიციის თანამშრომლის მიერ დაშვებული შეცდომა, რომელსაც გენერალური ინსპექცია აუცილებლად შეისწავლის", - განაცხადა გიორგობიანმა.

რაც შეეხება არასრულწლოვნის ადგილსამყოფელის, გიორგობიანის განცხადებით, საქართველოს შინაგან საქმეთა სამინისტრო უკვე დაუკავშირდა კოლეგა უწყებას თურქეთში და მიაწოდა ინფორმაცია, რათა ადგილსამყოფელის დადგენა დროულად მოხდეს.

"ასევე ჩვენ უკვე ხაზზე ვართ ოჯახთანაც, რომელსაც ყველა ინფორმაციას ოპერატიულად შევატყობინებთ", - განაცხადა გიორგობიანმა.

მშობლები ვარაუდობენ, რომ პანკისის ხეობის სოფელ დუმასტურიდან, სირიაში საბრძოლველად სკოლის მოსწავლეები, 16 წლის მ.კ და 18 წლის რ.ბ წავიდნენ. მოსწავლეების მშობლების ინფორმაციით, ისინი ორი დღის წინ სკოლაში წავიდნენ და უკან აღარ დაბრუნებულან.

როგორც "ინტერპრესნიუსის" კორესპონდენტი იუწყება, მოზარდების მშობლები ყვებიან, რომ ბავშვებს მთელი დღის განმავლობაში ეძებდნენ და ბოლოს პოლიციას მიმართეს, რის შემდეგაც, გაირკვა, რომ მოზარდებმა აეროპორტში სახელმწიფო საზღვარი გადაკვეთეს და თურქეთის მიმართულებით გაფრინდნენ.

მშობლები ეჭვობენ, რომ თურქეთიდან მათ სირიაში საბრძოლველად გადაიყვანენ.