საქართველოს პრეზიდენტი გიორგი მარგველაშვილი პარლამენტის წინაშე გამოსვლისას ქვეყნის მდგომარეობის უმნიშვნელოვანეს საკითხებზე გაამახვილებს ყურადღებას, - ამის შესახებ ჟურნალისტებს პრეზიდენტის საპარლამენტო მდივანმა გიორგი კვერენჩხილაძემ რამდენიმე დღის წინ განუცხადა.
მისივე განმარტებით, მოხსენება შეეხება როგორც საშინაო, ისე საგარეო საკითხებთან დაკავშირებულ თემებს.
"პრეზიდენტის ყოველწლიური მოხსენება კონსტიტუციის შესაბამისად, ქვეყნის მდგომარეობის უმნიშვნელოვანეს საკითხებს შეეხება. უფრო კონკრეტულად, მოხსენებაში განხილულ იქნება საგარეო და უშიშროების პოლიტიკასთან, ეკონომიკურ პრობლემებთან დაკავშირებული საკითხები. ასევე თავდაცვისა და შეირაღებული ძალების მდგომარეობა და პრობლემური თემები, ინსტიტუციური თემატიკა - ინსტიტუტების გაძლიერების, დემოკრატიული ფასეულობების, ადამიანის უფლებების, სხვადასხვა ინსტიტუციური რეფორმის და სხვა საკითხები,"- აღნიშნა პრეზიდენტის საპარლამენტო მდივანმა.
რაც შეეხება უშუალოდ ქვეყანაში არსებულ ეკონომიკურ მდგომარეობას, ცნობილია, რომ პრეზიდენტი გიორგი მარგველაშვილი პარლამენტში გამოსვლისას აღნიშნული მიმართულებით 9 თემაზე გაამახვილებს ყურადღებას. ეკონომიკურ საკითხებში პრეზიდენტის მრჩევლის, გიორგი აბაშიშვილის განცხადებით, ეს თემებია: ეკონომიკის ინკლუზიური განვითარების აუცილებლობა, ევროკავშირთან ღრმა და ყოვლისმომცველი თავისუფალი ვაჭრობა, რეგიონის ეკონომიკური თანამშრომლობა, ლარის კურსის მერყეობა და ეკონომიკური ზრდის შენელება, კონკურენციის პოლიტიკა, მცირე და საშუალო ბიზნესის მცირე წილი ეკონომიკაში, ბიზნესგარემოს გაუარესების რისკის არსებობა, მთავრობის მხრიდან მეტი კომუნიკაციის საჭიროება ბიზნესთან, ეკონომიკური გუნდის მხრიდან სტრატეგიული ხედვის არსებობა ეკონომიკაში და შესაბამისად, აღნიშნული მიმართულებებით გადაწყვეტილებების სწრაფად მიღება.
პრეზიდენტი პარლამენტს ყოველწლიური მოხსენებით დღეს, 13:00 საათზე მიმართავს.