საპარლამენტო ფრაქცია "თავისუფალი დემოკრატების" ერთ-ერთი ლიდერის, ზურაბ აბაშიძის შეფასებით, უმრავლესობა პრეზიდენტის ინსტიტუტს პატივს არ სცემს.
როგორც აბაშიძემ "ინტერპრესნიუსს" მმართველი გუნდის მიერ ქვეყნის პირველ პირთან დღეს დაგეგმილი შეხვედრის გადადების საკითხზე კომენტირებისას განუცხადა, სახელმწიფო ინსტიტუტებისადმი ამგვარი დამოკიდებულებით უმრავლესობა წინა ხელისუფლების "სვლით სიარულს" აგრძელებს.
"მგონია, რომ უმრავლესობა გაებუტა პრეზიდენტს. ალბათ იმიტომ, რომ პრეზიდენტმა რიგგარეშე საპარლამენტო სხდომის მოწვევის გადაწყვეტილება მიიღო.
გაბუტვის გამო მათ დღეს უარი თქვეს ისეთი მნიშვნელოვანი საკითხის განხილვაზე, როგოროცაა ქვეყნის ტერიტორიული მთლიანობა, აფხაზეთსა და ე.წ. სამხრეთ ოსეთთან დაკავშირებული საკითხი. აქ ჩანს დღევანდელი უმრავლესობის დამოკიდებულება და პატივისცემა სახელმწიფო ინსტიტუტების მიმართ. სამწუხაროდ, მმართველი გუნდი წინა ხელისუფლების სვლით აგრძელებს სიარულს. ესაა სამწუხარო რეალობა", - აღნიშნა აბაშიძემ.
ამასთან, საპარლამენტო უმრავლესობის ლიდერის დავით საგანელიძის განცხადებით, პრეზიდენტის აპარატს დაუკავშირდნენ და პრეზიდენტთან შეთანხმებით მივიღეს გადაწყვეტილება, რომ შეხვედრა, რომელიც დღეს 13:00 საათზე იყო დაგეგმილი, გარკვეული ვადით, ცოტა ხნით, გადაიდო.
დღეს "ინტერპრესნიუსთან" კომენტარი გააკეთა საპარლამენტო უმრავლესობის წარმომადგენელმა, გოგი თოფაძემ, რომელმაც შეხვედრის ჩაშლის მიზეზად სწორედ პრეზიდენტის მიერ რიგგარეშე სესიის დანიშვნა დაასახელა.
