პრინციპები არის სრულიად ნათელი, ჩვენ გვჭირდება დამოუკიდებელი და ეფექტური პროკურატურა, - ამის შესახებ პარლამენტის თავმჯდომარე დავით უსუფაშვილმა სასტუმრო "რედისონში" განაცხადა , სადაც პროკურატურისა და შს სამინისტროს რეფორმირების საკითხზე მე-11 საზოგადოებრივი ფორუმი იმართება.
როგორც პარლამენტის თავმჯდომარემ განმარტა, პროკურატურას უნდა შესწევდეს უნარი განახორციელოს ის უმნიშვნელოვანესი რამ, რაც სახელმწიფოს უპირველესი ფუნქციაა.
"სახელმწიფოს უპირველესი ფუნქცია ეს არის კანონიერების დაცვა, მოსახლეობის უფლებების დაცვა, მოქალაქეების უფლებების დაცვა, მართლმსაჯულების აღსრულება და კრიმინალთან ბრძოლა. ამ უმნიშვნელოვანეს ფუნქციების აღსრულებას სჭირდება აბსოლუტურად დეპოლიტიზებული პროკურატურა. ვფიქრობ, უნდა ვიმსჯელოთ იმ ინსტრუმენტებზე, რომლებმაც ეს მიმართულება უნდა გააძლიეროს, რადგან ჩვენ მემკვიდრეობით მივიღეთ პოლიტიკური ძალის არათუ შემადგენელი პროკურატურა, არამედ პროკურატურასა და პოლიციაზე დაფუძნებული პოლიტიკური ძალა, ხელისუფლება, რომელიც ხელისუფლობდა სწორედ პროკურატურის და პოლიციის მეშვეობით. როგორ უნდა მივიდეთ აქედან იქამდე, რომ პროკურატურა და პოლიცია, ორივე ეს მიმართულება იყოს სრულად დეპოლიტიზებული და პროკურორი და პოლიციელი ემსახურებოდეს სახელმწიფოს და არა მთავრობას, ამაზე ცხადია დისკუსიები და მსჯელობებია საჭირო და მხოლოდ სურვილით ამ სანუკვარ მიზნამდე და ამოცანამდე ვერ მივალთ", - აღნიშნა პარლამენტის თავჯდომარემ.
დავით უსუფაშვილის განმარტებით, პროკურატურის რეფორმის პროცესში მეორე მნიშვნელოვანი მომენტია მისი ეფექტურობის და პროფესიონალიზმის გაზრდა.
"ვიცით, რომ წლების განმავლობაში ეს სისტემა არადანიშნულებისამებრ გამოიყენებოდა, რის შედეგადაც მივიღეთ ძალიან მნიშვნელოვანი პრობლემები - ინსტიტუციური დეკვალიფიკაცია. აქ არ არის საუბარი ინდივიდებზე, რომელსაც მარტივად შეცვლი და კარგად მომზადებულ პროკურორს მოიყვან, პროკურატურამ ინსტიტუციური დეკვალიფიკაცია განიცადა და ბიუჯეტის შევსების საფინანსო პოლიციის ფუნქცია შეითავსა პრაქტიკულად. ახლა ახალი ამოცანები გვაქვს და ბევრი რამ სხვანაირად უნდა გაანალიზდეს. კრიტიკისგან თავს შევიკავებ, რადგან პროცესი მიდის", - აღნიშნა დავით უსუფაშვილმა.
