საქართველოს პრეზიდენტი გიორგი მარგველაშვილი უზენაესი სასამართლოს თავმჯდომარის კანდიდატურასთან დაკავშირებით იუსტიციის უმაღლესი საბჭოს წევრებს ხვდება.
შეხვედრას უზენაესი სასამართლოსა და იუსტიციის უმაღლესი საბჭოს თავმჯდომარე კონსტნატინე კუბლაშვილიც ესწრება. როგორც შეხვედრის დაწყებამდე კონსტანტინე კუბლაშვილმა ჟურნალისტებს განუცხადა, დღევანდელ შეხვედრაზე საუბარი იქნება მხოლოდ და მხოლოდ კრიტერიუმებზე, რომლის მიხედვითაც უნდა შეფასდეს კანდიდატი, რომელიც შემდგომ პრეზიდენტის მიერ პარლამენტს წარედგინება.
"პირველი და ყველაზე მთავარი აქ არის კეთილსინდისიერება და მეორე, კვალიფიკაცია იმ სფეროში რაშიც ის საქმიანობს. ეს ორი მთავარი პრინციპი იქნება ჩემი აზრით, ასარჩევად და დანარჩენი უკვე პრეზიდენტის გადასაწყვეტია, მან უნდა შეარჩიოს კანდიდატი. ჩემი აზრით, ის სწორედ ამ კრიტერიუმებს გაითვალისწინებს, როდესაც თავის რჩეულს წარმოადგენს", - განაცხადა კონსტანტინე კუბლაშვილმა.
რაც შეეხება უზენაესი სასამართლოს თავმჯდომარის თანამდებობაზე, მედიაში გავრცელებულ შესაძლო კანდიდატებს, კონსტანტინე კუბლაშვილის თქმით, ის ვინც დასახელდა, ვერც ერთ მათგანზე კონკრეტულ კომენტარს ჯერჯერობით ვერ გააკეთებს.
"მე პირადად არ ვაპირებ, რომ კონკრეტულ გვარებზე ვისაუბრო", - განაცხადა კუბლაშვილმა.
კითხვაზე, ხომ არ უქმნის უხერხულობას, რომ დღევანდელ შეხვედრაზე სწორედ მისი შემცვლელის კანდიდატურაზე იქნება საუბარი, კუბლაშვილის თქმით, ეს მას უხერხულობას არ უქმნის.
"პირიქით, მინდა მადლობა ვუთხრა პრეზიდენტს, რომ ასე ღიად ისურვა იუსტიციის უმაღლეს საბჭოს შეხვედროდა. პირიქით, კარგია, რომ ასეთი რაღაც ხდება", - განაცხადა კუბლაშვილმა.
უზენაესი სასამართლოს თავმჯდომარის პოსტზე კონსტანტინე კუბლაშვილს უფლებამოსილების ვადა თებერვალში ეწურება.
