საქართველოს პრეზიდენტის, გიორგი მარგველაშვილის განცხადებით, ევროპარლამენტის მიერ საქართველო-ევროკავშირის ასოცირების ხელშეკრულების რატიფიკაცია სხვა ქვეყნებისთვისაც დადებითი იმპულსი იქნება. ამის შესახებ გიორგი მარგველაშვილმა ევროპარლამენტში გამართულ პრესკონფერენციაზე განაცხადა.
მისი თქმით, ასოცირების ხელშეკრულების რატიფიკაციის პროცესი სპეციფიური პროცესია, რომელიც დიდხანს გრძელდება.
"უკვე 10 ქვეყანაა, რომელთაც მოახდინეს ხელშეკრულების რატიფიცირება. რჩება 18 ქვეყანა, რომელმაც ეს პროცესი უნდა გაიაროს. იმედი გვაქვს, რომ დღეს მიღებული გადაწყვეტილებები გახდება დადებითი იმპულსი ამ ქვეყნებისთვის.
საბოლოო რატიფიცირების პროცესის დასრულების შემდეგ ჩვენ ძალაში შევიყვანთ ყველა ხელშეკრულებას, რომელიც ორმხრივია ევროკავშირსა და საქართველოს შორის", - განაცხადა მარგველაშვილმა.
მისი თქმით, ეს ყველაფერი საქართველოს ვიზა ლიბერალიზაციის პროცესში დაეხმარება. როგორც პრეზიდენტმა აღნიშნა, ქვეყანამ ვიზა ლიბერალიზაციის პირველი ფაზით აღებული ვალდებულებები წარმატებით შეასრულა და მეორე ფაზასაც წარმატებით გავდივართ.
"გარწმუნებთ, რომ ყველა მიმართულებით საქართველოს ხელისუფლება აქტიურად მუშაობს", - განაცხადა მარგველაშვილმა.
საქართველოს პრეზიდენტის განცხადება პირდაპირ ეთერში ტელეკომპანია "რუსთავი 2"-მა გადასცა.
