ელჩებისთის ცოტა გაუგებარია, რა ხდება და რატომ ხდება, - ამის შესახებ საქართველოს პარლამენტის თავმჯდომარემ დავით უსუფაშვილმა ტელეკომპანია "იმედის" გადაცემა "რეაქციაში" საქართველოში განვითარებული პოლიტიკური მოვლენების შეფასებისას განაცხადა.
მისი თქმით, ელჩები კითხვებს სვამენ როგორც კურსთან დაკავშირებით, ისე ხელისუფლებაში განვითარებულ მოვლენებზე. "დღეს "თავისუფალი დემოკრატების" მხრიდან გადადგმულმა ნაბიჯმა და მათმა განცხადებებმა, რომლებსაც ვთვლი, რომ იყო ნაჩქარევი და ემოციურ ფონზე გაკეთებული, თითქოს ქვეყნის მიმართულება იცვლება და საფრთხეშია, უამრავი კითხვა გააჩინა გარეთ, თუ რა ხდება საქართველოში, რატომ ხდება ასეთი მოვლენები. ჩვენ დღესაც, ხვალაც და კიდევ რამდენიმე კვირის განმავლობაში მოგვიწევს იმის ახსნა, თუ რა მოხდა. ჩვენ გვქონდა შეხვედრა ელჩებთან და ჩვენს სტუმრებთან, რომელთათვისაც ცოტა გაუგებარია, რა ხდება და რატომ ხდება", - განაცხადა პარლამენტის თავმჯდომარემ.
მისივე თქმით, მინისტრების გადადგომამ ქვეყნის ევროპული კურსის ტემპის შემცირება გამოიწვია. "ქვეყნის კურსი არ იცვლება. მაგრამ ერთია კურსი არ შეცვალო, მეორე - რა ტემპით მიდიხარ იმ დასახული ამოცანებისკენ. ფაქტია, რომ ჩვენ ტემპი შეგვიმცირდა რადგან გამოგვაკლდა ხალხი, რომლებიც ამ საქმეს მიჰყვებოდა. თუმცა, დარწმუნებული ვარ, გამოჩნდება ხალხი, რომელიც ამ საქმეს გააგრძელებს. მეორე მხრივ ტემპი შეჩერდა მათი განცხადებებით, იმ ადამიანების განცხადებებით, ვინც იყო კონტაქტში მთელ დანარჩენ სამყაროსთან", - აღნიშნა უსუფაშვილმა.
პარლამენტის თავმჯდომარე მიიჩნევს, რომ განვითარებული მოვლენების თავიდან აცილება შეიძლებოდა, თუ ყველა მხარე ცოტა მეტ დაფიქრებას გამოიჩენდა ნაბიჯების გადადგმისას. "არ მინდა ისე გამოჩნდეს, რომ ვიღაცეებში ვხედავთ პრობლემას. ჩვენ, კოალიცია "ქართული ოცნება" ძალიან კარგად უნდა დავფიქრდეთ, რომ როდესაც ვიღებთ პასუხისმგებლობას ქვეყნის მართვაზე, ჩვენი ყოველი ნაბიჯი არის ყურადღების ცენტრში. ცოტა მეტი გვმართებს, რომ არ დავაზარალოთ ქვეყანა", - განაცხადა უსუფაშვილმა.
