უკრაინის პარტია "ბატკივშჩინას" ლიდერმა იულია ტიმოშენკომ გადაცემა "შუსტერ ლაივის" ეთერში საქართველოს ეკონომიკის ყოფილი მინისტრი გიორგი არველაძე საკუთარი გუნდის წევრად წარადგინა.
უკრაინის ყოფილი პრემიერ-მინისტრის განცხადებით, გიორგი არველაძე იმ გუნდის წევრია, რომელმაც საქართველოში რეფორმები გაატარა.
"გიორგი არველაძის უკან კიდევ ათობით ინტელექტუალი ქართველი დგას, რომლებმაც უკრაინაში ძლიერი რეფორმების პროგრამა შეიმუშავეს", - განაცხადა იულია ტიმოშენკომ.
გადაცემის მსვლელობისას იულია ტიმოშენკომ ასევე აღნიშნა, რომ მისი პარტია უკრაინის ახალ პარლამენტში ოპოზიციაში არ იქნება.
"გარწმუნებთ, რომ ახალ პარლამენტში "ბატკივშჩინა" ოპოზიციაში არ იქნება, ჩვენ დემოკრატიულ კოალიციაში მივდივართ", - განაცხადა იულია ტიმოშენკომ.
უკრაინაში ვადამდელი საპარლამენტო არჩევნები ხვალ გაიმართება.
