თურქეთის რელიგიურ საქმეთა დეპარტამენტის ხელმძღვანელი მეჰმედ გორმეზი იმედს გამოთქვამს, რომ ორი ქვეყნის ხელისუფალთა შეთანხმების შესაბამისად ახალციხეში არსებული ახმედის, ასევე ბათუმში აზიზიეს მეჩეთი აშენდება. ამის შესახებ მეჰმედ გორმეზმა დღეს საპატრიარქოში შეხვედრაზე განაცხადა.
საქართველოს პატრიარქთან შეხვედარზე მეჰმედ გორმეზმა მადლობა გადაუხადა უწმინდესს დახვედრისა და მიღებისათვის და იმედი გამოთქვა, რომ მათი პირველი ვიზიტი საქართველოში და უწმინდესთან შეხვედრა ხელს შეუწყობს ძმობისა და მეგობრობის გამტკიცებას.
შეხვედრაზე მეჰმედ გორმეზიმ განაცხადა, რომ თურქეთსა და საქართველოს ისტორიულად კარგი ურთიერთობები ჰქონდა და ისინი ერთმანეთთან ნათესაური კავშირებით არის განტკიცებული. მეჰმედ გორმეზმა გაიხსენა 1800-იანი წელი, როდესაც საქართველო ძალიან ბევრმა განსხვავებული აღმსარებლობის ადამიანმა დატოვა და თურქეთში დასახლდა. გორმეზის თქმით, ამის შემდეგ, ბათუმსა და ახალციხეში მათ ბევრი საერთო ნათესავი გააჩნიათ.
თურქეთის რელიგიურ საქმეთა დეპარტამენტის ხელმძღვანელმა საუბრისას ასევე აღნიშნა, რომ კათოლიკოს-პატრიარქის მიერ შეხვედრის დროს გახსენებული ბავშვობის მოგონებები მუსულმან მეზობლებთან დაკავშირებით მართლაც შთამბეჭდავია, თუმცა მწუხარება გამოთქვა, იმასთან დაკავშირებით, რომ დღევანდელ რეალობაში ისტორიული კარგი ფაქტების გადმოტანა არ ხდება. მან მწუხარება გამოთქვა ასევე იმასთან დაკავშირებით, რომ კაცობრიობა წინსწვალს განიცდის სხვადასხვა სფეროში, მაგრამ სხვადასხვა რელიგიური აღმსარებლობის ადამიანებს უჭირთ და ამ მხრივ უკუსვლაც კი შეინიშნება.
"თბილისი - ისტორიულად მუსლიმთა და ქრისტიანების ერთდროული თანაცხოვრების ადგილი ყოფილა. მუსულმანთა მმართველობის პერიოდში ქრისტიანებს ჰქონდათ თავიანთი ქრისტიანული რელიგიის აღმსარებლობის უფლება. იგივე ქრისტიანული მმართველობის პერიოდში მუსულმანებს ჰქონდათ თავისუფალი აღმსარებლობის უფლება და ეკლესია, მეჩეთები, რომლებზეც თქვენ საუბრობდით, ეს არის ისტორიის გადმონაშთები. მათი 90% ისტორიული ძეგლია. თანამედროვე პერიოდში აშენებული მეჩეთების რაოდენობა კი ძალიან ცოტაა ან არის შეკეთებული და განახლებული", - აღნიშნა მეჰმედ გორმეზიმ.
მისივე თქმით, ანკარაში ყველა ქართველ ქრისტიანს აქვს თავისი აღმსარებლობის უფლება, გაზარდონ შვილები თავისი სარწმუნოების მიხედვით. ასევე ყველა მუსულმანს, რომელიც საქართველოში ცხოვრობს უნდა ჰქონდეს თავისი აღმსარებლობის, შვილების რელიგიური განათლებისა და რელიგიური რიტუალების შესრულების უფლება. მეჰმედ გორმეზი მიიჩნევს, რომ ეს მათი უფლებაა.
თურქეთის რელგიური საქმეთა დეპარტამენტის ხელმძღვანელმა შეხვედრაზე ასევე ისაუბრა თურქეთისა და საქართველოს ერთობლივ რელიგიურ კომისიაზე, რომელმაც ორ ქვეყანას შორის ამ თვალსაზრისით მრავალი პრობლემა უნდა მოაგვაროს.
"დღეს აღმსარებლობის გამო ხდება გაუცხოება და სხვა რელიგიის წარმომადგენლებს სივრცეს არ უტოვებენ. ეს არის მიუღებელი, ეს არის კაცობრიობის ბოლო წლების სერიოზული პრობლემა. არ გაივლის დღე ისე ევროპაში, რომელიც მსოფლიო ცივილიზაციის ცენტრად ითვლება, არ მოხდეს თავდასხმა მეჩეთზე, ან ღორის თავი არ იყოს ჩამოკიდებული. ჩვენ ვიცით იმ მიზეზების შესახებ რით არის ეს გამოწვეული, მაგრამ ეს მიზეზები არ იძლევა იმის საშუალებას, რომ თავდასხმები განხორციელდეს", - აღნიშნა მეჰმედ გორმეზიმ.
თურქეთის რელიგიურ საქმეთა დეპარატამენტის ხელმძღვანელმა საუბრისას ასევე სრულიად საქართველოს კათოლიკოს-პატრიარქის ანკარაში ვიზიტი გაიხსენა და აღნიშნა, რომ პატრიარქმა თურქეთში ქართული ეკლესიების პრობლემა დასვა. გორმეზიმ აღნიშნა, რომ მათ ეს საკითხი ჩაინიშნეს და ამაზე მუშაობენ. გორმეზიმ ასევე ისაუბრა სტამბულში ქართული ეკლესიის შესახებ რომელიც სხვა ქრისტიანული ეკლესიის წარმომადგენლებს უკავიათ და დასძინა, რომ გააკონტროლებენ ამ ეკლესიის სამართლებრივი სტატუსს. საუბარი შეეხო ასევე ოშკისა და იშხანის თემას და დასძინა, რომ თავად მას ეს ტაძრები არ უნახავს და პატრიარქის მოსაზრებებს ამ ტაძრებთან დაკავშირებით მოისმენს.
"აქვე მინდა გამოვთქა ჩემი რწმენა იმასთან დაკავშირებით, რომ ქვეყნის ხელისუფალთა შეთანხმების შესაბამისად, ახალციხეში არსებული ახმედის და ასევე ბათუმში აზიზიეს მეჩეთი აშენდება. ორივეს სარესტავრაციო სამუშაოები ისე უნდა წარიმართოს, რომ აღსდგეს მისი პირვანდელი სახე", - აღნიშნა მეჰმედ გორმეზიმ.
მისივე თქმით, მთელი სამყარო არის ერთი ღვთისაგან შექმნილი და პრობლემა დაიწყო მაშინ, როდესაც ადამიანებმა ეს სამყარო ვერ დაინახეს ერთი მთლიანი სივრცე და ვიწრო კედლებში გამოიკეტნენ.
"დარწმუნებული ვართ, რომ ის საკითხები, რომელიც ჩვენ განვიხილეთ, ერთობლივი კომისია ჩაუღრმავდება და ერთად ვუმუშავებთ", - აღნიშნა მეჰმედ გორმეზიმ.
