მინსკში პარასკევს მიღწეული შეთანხმების მიუხედავად, "ბოევიკებმა" ზავი დაარღვიეს და რუს სამხედროებთან ერთად უკრაინული არმიის პოზიციების დაცხრილვას ახორციელებენ. "უნიანის" ინფორმაციით, ამის შესახებ უკრაინის სამხედრო-პოლიტიკური კვლევების ცენტრის დირექტორი დიმიტრი ტიმჩუკი "ფეისბუქის" საკუთარ გვერდზე წერს.
მისი თქმით, უკრაინელი სამხედროები მკაცრად იცავენ ზავის პირობებს, არ იყენებენ აქტიურ მოქმედებებს. ტიმჩუკის ინფორმაციით, 6 სექტემბერს ბოევიკებმა სამი დასახლებული პუნქტი დაცხრილეს, ასევე ნაღმმტყორცნებიდან ისროდნენ დონეცკის აეროპორტის მიმართულებით. მარიუპოლის რაიონში ცეცხლი გაუხსნეს უკრაინის არმიის ბლოკპოსტებს. მისივე ინფორმაციით, უკრაინელმა სამხედროებმა საპასუხო ცეცხლის შედეგად, მოწინააღმდეგის ერთი ტანკი გაანადგურეს.
5 სექტემბერს, მინსკში საკონტაქტო ჯგუფის მონაწილეებმა ხელი მოაწერეს დონბასში ცეცხლის დაუყოვნებელი შეწყვეტის პროტოკოლს, რომელიც 5 სექტემბრის, 18:00 საათიდან შევიდა ძალაში.
