საქართველოს საგარეო საქმეთა მინისტრი მაია ფანჯიკიძე იმ მიზეზს განმარტავს, რის გამოც თურქეთის პრეზიდენტის ინაუგურაციაზე დასასწრებად არა საქართველოს პრეზიდენტი, არამედ პრემიერ-მინისტრი გაემგზავრება.
როგორც ფანჯიკიძემ ჟურნალისტებს განუცხადა, გიორგი მარგველაშვილი თურქეთში უკვე იმყოფებოდა, ირაკლი ღარიბაშვილს კი პრემიერ-მინისტრის პოსტზე მუშაობის პერიოდში თურქეთში ვიზიტი არ განუხორციელებია.
"იმის გამო, რომ საქართველოს და თურქეთის პრეზიდენტების ვიზიტების გაცვლა წელს უკვე მოხდა – მოგეხსენებათ, ბატონი გიორგი მარგველაშვილი ბრძანდებოდა თურქეთში და თურქეთის პრეზიდენტიც იმყოფებოდა საქართველოში, თურქეთის პრეზიდენტის ინაუგურაციაზე მიემგზავრება საქართველოს პრემიერ-მინისტრი. ირაკლი ღარიბაშვილი არ ყოფილა თურქეთში რაც ის პრემიერ-მინისტრია. თურქეთის მხრიდანაც იყო მოლოდინი, რომ საქართველოდან პრემიერი ჩავიდოდა", - განაცხადა მაია ფანჯიკიძემ.
საგარეო უწყების ხელმძღვანელის შეფასებით, ამაში არაფერი განსაკუთრებული არ არის.
თურქეთის ახლად არჩეული პრეზიდენტის რეჯეფ ტაიპ ერდოღანის ინაუგურაცია 28 აგვისტოს ანკარაში გაიმართება.
