ვარკეთილში, სამხედრო ქალაქში ჯარისკაცებისთვის გადასაცემად ბინები მზად ოქტომბრის ბოლოს იქნება. სამხედრო ქალაქში მშენებლობის სამუშაოებს დღეს გაერთიანებული შტაბის უფროსი ირაკლი ძნელაძე და თავდაცვის მინისტრის მოადგილე ირაკლი გეგეჭკორი დაესწრნენ.
როგორც გეგეჭკორმა ჟურნალისტებს განუცხადა, მშენებლობა მაისის შემდეგ აქტიურად მიმდინარეობს და 31 ოქტომბერს 4 კორპუსი გადასაცემად უკვე მზად იქნება. სულ ამ 4 კორპუსში 891 ბინაა.
"მშენებლობა დასრულდება ოქტომბრის ბოლოს. საკმაოდ მკაცრი ვადებია დაწესებული. უშუალოდ ამ კორპუსში 18-მდე ბინა გარემონტდება სპეციალური პროექტით. გაკეთებული იქნება სამხედროების მოთხოვნების შესაბამისად", - განაცხადა გეგეჭკორმა.
მისივე ინფორმაციით, ბინების მშენებლობა შეჩერებული იყო 2012 წლის სექტემბერში.
მშენებლების ინფორმაციით კი, მშენებლობა შეჩერებული იყო დიმიტრი შაშკინის სიტყვიერი განკარგულებით. მაისიდან კი სამუშაოები აქტიურად მიმდინარეობს. გარდა ამ 4 კორპუსისა, სამხედრო ქალაქში უკვე ექსპლუატაციაში შესულია ერთი კორპუსი.
