თავდაცვის ყოფილი მინისტრი ბაჩო ახალაია დავით ჩხიტუნიძის ათენის ციხეში ცემის ფაქტს ე.წ. კანონიერი ქურდების შეკვეთას უკავშირებს.
ახალაიამ სოციალური ქსელის მეშვეობით განცხადება გაავრცელა, რომელსაც "ინტერპრესნიუსი" უცვლელად გთავაზობთ:
"რამდენიმე დღის წინ ქართველი კანონიერი ქურდების შეკვეთით, სასიკვდილოდ იქნა გამეტებული იუსტიციის სამინისტროს ყოფილი მაღალჩინოსანი დავით ჩხიტუნიძე. ამ კრიმინალებს ტყუილად ჰგონიათ, რომ მათი დრო მოვიდა და შეუძლიათ შური იძიონ სახელმწიფოზე, მოქალაქეებზე, ყოფილ ან მოქმედ თანამშრომლებზე, რომელთაც დაამყარეს ქვეყანაში წესრიგი. რა დროც არ უნდა დასჭირდეს ამ ვითარების გარკვევას, გარწმუნებთ, შემკვეთებიც და შემსრულებლებიც უმკაცრესად აგებენ პასუხს კანონის წინაშე. მინდა ვუთხრა კანონიერ ქურდებს, რომ მათი ,,პალაჟენიის" დანგრევა და წესრიგის დამყარება ჩემი ,,ბრალია" და ამ საქმეს ადრე თუ გვიან, აუცილებლად მივიყვან ბოლომდე", - აღნიშნულია ახალაიას განცხადებაში.
