ეგვიპტეში სამართალდამცავებსა და პატიმრობაში მყოფ პრეზიდენტ მოჰამედ მურსის მხარდამჭერებს შორის დაპირისპირების შედეგად დაღუპულთა რიცხვი 638-მდე გაიზარდა . ამის შესახებ "ბიბისი" იუწყება.
გავრცელებული ინფორმაციით, "მუსლიმთა საძმო" ქაიროში დღეს მურსის მხარდამჭერი აქციების განახლებას გეგმავს და ეგვიპტელებს ქუჩაში გამოსვლისკენ მოუწოდებს.
ეგვიპტეში მომხდარ სისხლისღვრას გამოეხმაურა აშშ-ის პრეზიდენტი. ბარაქ ობამამ ეგვიპტის დროებითი მთავრობის ქმედება დაგმო და განაცხადა, რომ ეგვიპტის ხელისუფლებამ "სახიფათო გზა აირჩია" და რომ აშშ-სა და ეგვიპტეს შორის თანამშრომლობა ნორმალურ რეჟიმში არ გაგრძელდება, ვიდრე იქ ქუჩებში ხალხს ხოცავენ. მისივე განცხადებით, ამ ეტაპზე აშშ ეგვიპტესთან საერთო სამხედრო წვრთნებს წყვეტს. თუმცა, ბარაქ ობამამ თავი შეიკავა ეგვიპტისთვის 3,1 მილიარდი დოლარის დახმარების შეწყვეტაზე, რომელსაც აშშ ყოველწლიურად გამოყოფს ქვეყნისთვის.
შექმნილი ვითარების გამო ეგვიპტის დროებითმა მთავრობამ ქვეყანაში საგანგებო რეჟიმი გამოაცხადა, რამდენიმე პროვინციაში კი კომენდანტის საათი მოქმედებს.
