ციხის სკანდალური კადრების ავტორს ვლადიმერ ბედუკაძეს მიმდინარე გამოძიების ფარგლებში ჟურნალისტებთან კონტაქტი აეკრძალა. ამის შესახებ თბილისის საქალაქო სასამართლოში პატიმართა მიმართ არადამიანურ მოპყრობასა და წამებაში ბრალდებულების მიმდინარე წინასასამართლო სხდომაზე ჟურნალისტებს ბედუკაძის ადვოკატმა ლალი აფციაურმა განუცხადა.
აფციაურის თქმით, არსებობს პროკურატურის დადგენილება, რომლის მიხედვით ბედუკაძეს მედიასთან კონტაქტი ეკრძალება.
"ინტერპრესნიუსი" აღნიშნულ საკითხზე კომენტარი თავად ვლადიმერ ბედუკაძეს სთხოვა, თუმცა მან ამაზე უარი განაცხადა და ჟურნალისტს უთხრა, რომ მის კომენტარზე ნებართვისთვის პროკურატურის პრესსამსახურის ხელმძღვანელს ხათუნა პაიჭაძეს დაკავშირებოდა.
ბედუკაძე ერთ-ერთი ბრალდებულია იმ საქმეზე, რომელიც საქალაქო სასამართლოში ამ წუთებში მიმდინარეობს. საქმის განხილვა დახურულ რეჟიმში ტარდება. წინასასამართლო პროცესს მოსამართლე ვაჟა ფუხაშვილი ატარებს. პატიმართა წამებასა და არადამიანურ მოპყრობაში ციხის ადმინისტრაციის 17 ყოფილი თანამშრომელია ბრალდებული.
