„თავისუფალი საქართველო“  „რუსთავი 2“- ს პარტიის პოპულარიზაციაში შეტანილი წვლილისთვის მადლობას უხდის.  აღნიშნულის შესახებ,  პარტია განცხადებას ავრცელებს.

როგორც განცხადებაშია აღნიშნული,  „რუსთავი 2“- ის ეთერით, თენგიზ გოგოტიშვილმა   მეუფე იობზე თავდასხმა გააგრძელა. ამჯერად კი,  გოგოტიშვილის ყურადღების ცენტრში პარტია „თავისუფალი საქართველოც“  მოექცა.

„თავისუფალი საქართველო“ მადლობას უხდის „რუსთავი 2“-ს პარტიის პოპულარიზაციაში შეტანილი წვლილისთვის, ვინაიდან, ისეთი დისკრედიტირებული ჟურნალისტის მხრიდან, როგორიც თენგიზ გოგოტიშვილია, პარტიის გალანძღვამ, სასარგებლოდ იმოქმედა ჩვენს რეიტინგზე. ამასთან, პარტია მზად არის „რუსთავი 2“-თან გააფორმოს სარეკლამო კონტრაქტი, რათა ტელეკომპანიამ უზრუნველყოს კვირაში ერთხელ, გოგოტიშვილის მხრიდან ჩვენი პარტიის „მაკომპრომიტირებელი“ სიუჟეტის განთავსება ეთერში. ამას გარდა, ცხადია, რომ სახელისუფლებო ტელეკომპანიის ეთერით ატეხილი პიარ-ისტერიის რეალური დამკვეთი, სააკაშვილ-მერაბიშვილის კლანია, რომელთა მიზანსაც მეუფე იობის არა მხოლოდ დისკრედიტაცია, არამედ მისი ნეიტრალიზაცია წარმოადგენს“, - ნათქვამია პარტიის მიერ გავრცელებულ განცხადებაში.  

ამასთან „თავისუფალი საქართველო“   ყველა ოპოზიციურ პარტიას და სამოქალაქო საზოგადოებას  მოუწოდებს,  მეუფე იობის მიმართ მხარდაჭერის გამოხატვისაკენ.