საკრებულოს სხდომამ, სადაც სტიქიასთან დაკავშირებით საბიუჯეტო ცვლილებები განიხილეს ხმაურით ჩაიარა.
„რესპუბლიკური პარტიის“ ერთ-ერთმა ლიდერმა, საკრებულოს წევრმა, თინა ხიდაშელმა სხდომაზე დედაქალაქში სანიაღვრე სისტემების რეაბილიტაციასთან დაკავშირებული დოკუმენტაციის სრულად წარმოდგენა მოითხოვა.
ხიდაშელის განცხადებით, დედაქალაქის ბიუჯეტის 3 მლნ ლარით გაზრდის გადაწყვეტილებას საკრებულო ისე იღებს, რომ ამის აუცილებლობის დასადასტურებლად ერთი პატარა დოკუმენტიც კი არ არსებობს.
„თქვენ ხართ ბიუჯეტის ქურდები, ცრუპენტელები და მატყუარები“, - მიმართა თინა ხიდაშელმა ფრაქცია „ერთიანი ნაციონალური მოძრაობის“ თავმჯდომარეს, ნიკო ხაჩირიშვილს და საკრებულოს საფინანსო-საბიუჯეტო კომისიის თავმჯდომარეს, თამაზ შოშიაშვილს.
ცნობისთვის, 12 მაისს სტიქიის შედეგად წარმოქმნილი ზარალის აღმოსაფხვრელად დედაქალაქის ბიუჯეტში ცვლილებები შევიდა. პროგრამის „ძველი თბილისის ახალი სიცოცხლე“ ფონდიდან თბილისის მერიის სარეზერვო ფონდში 3 მილიონი ლარი გადაირიცხება.
