სანამ ჩვენს ქვეყანას არ აღიქვამენ, როგორც ღირსეულ პარტნიორს, მანამდე ჩვენ გავაგრძელებთ ბრძოლას სწორედ იმისკენ, რომ აღიქვან, როგორც ღირსეული პარტნიორი და თითის ქნევას გაანებოს თავი ამა თუ იმ ბიუროკრატმა, - ასე გამოეხმაურა „დღის ქრონიკასთან“ საუბრისას რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველი მოადგილე ზვიად შალამბერიძე საქართველოსთან მიმართებაში ზოგიერთი ევროპარლამენტარის კრიტიკას.
ის ევროპარლამენტარებს ურჩევს, იქამდე, სანამ საქართველოსთან დაკავშირებით რაიმეს იტყვიან, ჯერ საკუთარ ქვეყნებში არსებულ მდგომარეობას გადახედონ.
„სანამ საქართველოს მთავრობა, რომელიც აღიარა ეუთო/ოდირმა, არ იქნება მიჩნეული მათ მიერ [ევროპარლამენტარების] ლეგიტიმურ ხელისუფლებად, ჩვენ რა თქმა უნდა მათ მიმართ შემხვედრ ნაბიჯებს არ გადავდგამთ. ეს არაერთხელ გაჟღერებულა ჩვენი მხრიდან და დღეს რომ გამოდიან და ამბობენ, თითქოს მზია ამაღლობელი ზის იმიტომ, რომ რაღაც ინფორმაცია გაავრცელა არჩევნებთან დაკავშირებით, რაღაც კომერციული სქემების და ა.შ. ეს არის სირცხვილი. იმიტომ, რომ ჩვენ ძალიან კარგი მაგალითები გვაქვს სხვადასხვა ქვეყანში, მათ შორის გერმანიაში თუ რამდენი თვით და რამდენი წლით ჰყავთ დაპატიმრებული ჟურნალისტები, რომლებსაც შეიძლება მხოლოდ ერთი „ფეისბუქ“ პოსტი ჰქონდათ დაწერილი. არ მახსოვს გვარი, რომელიც შვიდი თვით ჩასვეს, ჟურნალისტი. კიდევ არის სხვადასხვა მაგალითი და თავისთან მოიკითხონ ეს სიტუაციები და ეს მაგალითები და მერე ილაპარაკონ საქართველოზე“, - აღნიშნა ზვიად შალამბერიძემ.
