თბილისის საქალაქო სასამართლომ „ლელოს” ერთ-ერთი ლიდერის, ბადრი ჯაფარიძის აღკვეთის ღონისძიების შეფარდებაზე იმსჯელა და სრულად დააკმაყოფილა ბრალდების მხარის შუამდგომლობა გირაოს სახით 50 ათასი ლარის ოდენობით შეფარდების თაობაზე. საქმე ეხება პარლამენტის დროებითი საგამოძიებო კომისიის კანონიერი მოთხოვნის შეუსრულებლობის ფაქტზე დაწყებულ გამოძიებას.
საკითხს ჟურნალისტებთან საუბრისას საპარლამენტო ფრაქცია „ქართული ოცნების“ თავმჯდომარის მოადგილე ლევან მაჭავარიანი გამოეხმაურა.
მისი თქმით, მამუკა ხაზარაძეს და ბადრი ჯაფარიძეს არანაირად არ აწყობს კომისიის სხდომებზე მისვლა, ვინაიდან კომისიის მუშაობას, მთელ ამ პროცესს პირდაპირ ეთერში საქართველო უყურებს.
„იქ რაზე უნდა ილაპარაკონ? სიცრუეს მათ არავინ აპატიებს და სიმართლე რომ ილაპარაკონ, თავიანთი თავის წინააღმდეგ უნდა მისცენ ჩვენება. რომ მივიდნენ, რაზე უნდა ილაპარაკონ, უნდა ილაპარაკონ იმაზე, რომ კი, ჩვენ ვპარტნიორობდით „ნაციონალურ მოძრაობასთან“ ძალიან აქტიურად და კი ბატონო, „თბს ბანკი“ გამოიყენებოდა ერთ-ერთ მთავარ ინსტრუმენტად ბიზნესის რეკეტისთვის. შესაბამისად, მათ არანაირად არ აწყობთ მისვლა და ურჩევნიათ ამ რაღაც გამოგონილი საბაბებით თავი აარიდონ მისვლას, თუმცა, რა თქმა უნდა, ეს ყველაფერი ითვალისწინებს სისხლის სამართლის პასუხისმგებლობას“, - აღნიშნა ლევან მაჭავარიანმა.
ცნობისთვის, აღნიშნული საქმის ფარგლებში ბრალდება უკვე წარდგენილი აქვს მამუკა ხაზარაძეს.
