ყველამ იცის, ეკა გიგაური პოლიტიკურად რამდენად ანგაჟირებულია და პირდაპირ „ნაციონალური მოძრაობის“ აქტივისტს წარმოადგენს. მისი მხრიდან რაიმე ტიპის კრიტიკა, რა თქმა უნდა, არასერიოზულია, - განაცხადა ფრაქცია „ქართული ოცნების“ თავმჯდომარის მოადგილემ, ლევან მაჭავარიანმა.
მან კომენტარი გააკეთა კენჭისყრის დღის რეგულაციების დაზუსტებასთან დაკავშირებით ცესკოს მიერ მიღებულ ცვლილებასთან დაკავშირებით. მისივე თქმით, ეკა გიგაურის მხრიდან რაიმე ტიპის კრიტიკა არასერიოზულია.
„ასეთი ტიპის სპეკულაციები მოსალოდნელია. მათ ერთ-ერთ დღის წესრიგს წარმოადგენს, რომ ცესკოს რეპუტაცია შეარყიონ. მით უმეტეს, ისეთი ქალბატონისგან, როგორიც ეკა გიგაურია და ყველამ იცის, პოლიტიკურად რამდენად ანგაჟირებულია და პირდაპირ „ნაციონალური მოძრაობის“ აქტივისტს წარმოადგენს. მისი მხრიდან რაიმე ტიპის კრიტიკა, რა თქმა უნდა, არასერიოზულია. ვინაიდან ჩვენ მიჩვეულები ვართ, რომ ისინი ძირითადად, 99%-ის შემთხვევაში დეზინფორმაციას ავრცელებენ, რათა რაღაც ტიპის გაუგებრობა და აჟიოტაჟი შემოიტანონ ჩვენს საზოგადოებაში“, - განაცხადა მაჭავარიანმა.
ცნობისთვის, ცესკოს შესაბამის სამართლებრივ აქტში დაზუსტდა რამდენიმე პროცედურა. კერძოდ, ელექტრონული ტექნოლოგიებით კენჭისყრის ჩატარებისას, საარჩევნო კოდექსითა და დადგენილებით გათვალისწინებული შემთხვევების გარდა დაუშვებელია კენჭისყრის შენობაში ყოფნის უფლების მქონე ნებისმიერი პირის მიერ კენჭისყრის ოთახში ამომრჩევლის გადაადგილების ფიზიკურად შეფერხება, ასევე ამომრჩევლის პირადობის დამადასტურებელი დოკუმენტის ჩვენების მოთხოვნა, მათ შორის, გამორთმევა.
