ფრაქცია „ქართული ოცნების" თავმჯდომარის მოადგილე, ლევან მაჭავარიანი დიდი ბრიტანეთის ახალ საგრანტო პროგრამას ეხმიანება და აღნიშნავს, რომ ეს არის კიდევ ერთი მაგალითი, თუ როგორ იბრძვის „დიფ სთეითი“.
„საგრანტო პროგრამა შეიმუშავეს, რითაც უნდა ჩაანაცვლონ უკვე დესტრუქცია და მავნებლობა საქართველოში USAID-ის და NED-ის მაგივრად. სწორედ ამ ფონდებიდან უნდა იყვნენ უკვე დაფინანსებული ეს მდიდარი „ენჯეოები“, რომლებიც სხვათა შორის, ცოტა გაღარიბების ზღვარს იყვნენ მიახლოებული. ეს არის კიდევ ერთი მაგალითი, თუ როგორ იბრძვის „დიფ სთეითი”.
ქალბატონმა ლიზ ტრასმა, რომელიც 2022 წელს გახლდათ ბრიტანეთის პრემიერ-მინისტრი, რამდენიმე ინტერვიუში ბოლო ორი-სამი თვის განმავლობაში განაცხადა, რომ იგი დამოუკიდებლად გადაწყვეტილებებს ვერ იღებდა. ანუ „დიფ სთეითს“, მისივე თქმით, უფრო ღრმად აქვს ფესვები გადგმული დიდ ბრიტანეთში, ვიდრე აშშ-ში და მისი გადადგომის ერთ-ერთი მთავარი მიზეზი გახლდათ ის, რომ მის გადაწყვეტილებებში ერეოდა კონკრეტულად „დიფ სთეითი“, - განაცხადა მაჭავარიანმა.
USAID-ი ახალმა ფონდმა ჩაანაცვლა. რამდენიმე დღის წინ გამოქვეყნებულ წერილში ფილოსოფოსი ზაზა შათირიშვილი საუბრობდა „დიფ სთეითის“ მოდერნიზებაზე. ფილოსოფოსი წერდა, რომ „გლობალური ომის პარტია“ საქართველოს წინააღმდეგ მთავარ იარაღად ევროპას იყენებს. ამ ფონზე, კი ცნობილი ხდება, რომ დიდი ბრიტანეთის საგარეო საქმეთა სამინისტრო, საქართველოში მუნიციპალური არჩევნების წინ საგრანტო პროგრამას აცხადებს, რათა მათი თქმით, „ხელი შეუწყოს 2025 წლის ოქტომბერში დაგეგმილი საქართველოს მუნიციპალური არჩევნების ეფექტურად ჩატარებას“. მმართველ გუნდში აცხადებენ, რომ უცხოური დაფინანსების მთავარი მიზანი საქართველოში დესტრუქციის და არეულობის გამოწვევაა.
