2012 წელს ინსპექტირების რაოდენობა 400 იყო, მაშინ როდესაც გასულ წელს სააგენტომ, მთელი ქვეყნის მასშტაბით, 36 ათასი სახელმწიფო კონტროლი განახორციელა, - განაცხადა „სოფლის ნობათის“ რძის ნიმუშებში აღმოჩენილ დარღვევაზე საუბრისას სურსათის ეროვნული სააგენტოს ხელმძღვანელმა, ზურაბ ჩეკურაშვილმა „დღის ქრონიკაში“ ჩართვისას.
„სფერო და დარგი, რომელიც ფაქტობრივად, მიგდებული იყო, არავინ ყურადღებას არ აქცევდა, ფეხზე დადგა და ახლა ნამდვილად არის იმ ფუნქციის მატარებელი, რასაც ჰქვია ადამიანის ჯანმრთელობის, სიცოცხლისა და მომხმარებლის ინტერესების დაცვა.
სრული პასუხისმგებლობით გეუბნებით, რომ თითოეული ჩვენი თანამშრომელი 24-საათიან რეჟიმში მუშაობს, არა მხოლოდ სურსათის უვნებლობის სფეროში, არამედ ვეტერინარიასა და ფიტოსანიტარიაშიც, რადგან ჯანმრთელი სურსათი ჯანმრთელი ცხოველისა და მცენარისგან მოდის. ანუ, სამივე მიმართულება განსაკუთრებულ კონტროლზეა აყვანილი და ეს სტატისტიკაც ამაზე მეტყველებს“, - განაცხადა ჩეკურაშვილმა.
