დიდი ბრიტანეთის მთავრობამ საქართველოს იუსტიციის უმაღლესი საბჭოს წევრი, თბილისის სააპელაციო სასამართლოს მოსამართლე, ლევან მურუსიძე და თბილისის სააპელაციო სასამართლოს თავმჯდომარე, მიხეილ ჩინჩალაძე ისე დაასანქცირა, რომ განმარტებით ბარათში მოსამართლეების არაკეთილსინდისიერებაზე მხოლოდ ეჭვებსა და ვარაუდების დონეზეა საუბარი.
„არსებობს გონივრული ეჭვი, რომ ლევან მურუსიძე არღვევს ანტიკორუფციული სანქციების 2021 წლის გლობალურ რეგლამენტს: მურუსიძე მონაწილეობს ან მონაწილეობდა სერიოზულ კორუფციაში“, - ნათქვამია დიდი ბრიტანეთის მთავრობის მიერ გავრცელებულ განცხადებაში.
გარდა ამისა, დიდ ბრიტანეთში ვარაუდობენ, რომ მურუსიძემ „ქართული ოცნებისგან“ სასურველი სასამართლო განაჩენების გამოტანისთვის ფინანსური სარგებელიც მიიღო.
ანალოგიური დასკვნა წერია მიხეილ ჩინჩალაძის შემთხვევაშიც.
