საქართველოს ახალგაზრდა იურისტთა ასოციაციას, რასაც საქართველოს საკონსტიტუციო სასამართლოსგან ითხოვდა, როგორც ირკვევა, სტრასბურგის სასამართლოსთვის არ მოუთხოვია. საუბარია „გამჭვირვალობის კანონსა“ და მისი დროებით შეჩერების მექანიზმზე.
საია-ს აღიარება, მმართველი გუნდისთვის დასტურია, რომ „გამჭვირვალობის კანონის“ წინააღმდეგ აგორებული კამპანია ფარსი იყო და ეს თავად პროტესტის ავტორებმაც იცოდნენ.
„როდესაც საქართველოს საკონსტიტუციო სასამართლოში გაასაჩივრეს და მოითხოვეს კანონის აღსრულების შეჩერება, საკონსტიტუციო სასამართლომ ეს არ განახორციელა. როდესაც ანალოგიური საჩივარი შეიტანეს სტრასბურგის სასამართლოში, იქ ასეთი მოთხოვნა მათ არ დააყენეს სასამართლოს წინაშე, ვინაიდან იცოდნენ, რომ სტრასბურგის სასამართლო მათ ამას არ დაუკმაყოფილებდა და ამიტომ, მათი ეს პროპაგანდისტული შეტევა ხელისუფლებაზე მარცხით დასრულდებოდა. ეს მიუთითებს მათი განცხადებებისა და ქმედებების მანიპულაციურ ხასიათზე“, - განაცხადა რეგიონული პოლიტიკისა და თვითმმართველობის კომიტეტის თავმჯდომარემ, საპარლამენტო უმრავლესობის წევრმა ირაკლი ქადაგიშვილმა.
