ხელისუფლების სურვილი არ არის, რომ მედია იყოს ცენზურის ქვეშ - სახეზე გვაქვს ფაქტი, რომ მედიასივრცე დაზიანებულია და სწორედ ამას სჭირდება მოწესრიგება, დარეგულირება, - ამის შესახებ რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა განაცხადა.
მისი თქმით, საქართველოში მედია სტანდარტის აღსრულების მექანიზმი არ არსებობს და ამიტომ არის საჭიროება, რომ მედია სტანდარტების დაცვის მექანიზმი არსებობდეს.
„მედიასთან დაკავშირებით ჩვენ სწორედ ყველაზე უფრო გამოცდილი და ტრადიციული კანონმდებლობა, ამ შემთხვევაში, ბრიტანული კანონმდებლობა ავიღეთ. არის თუ არა ეს მედიის ჩარჩოებში მოქცევა?! როგორც მოგეხსენებათ, ზოგადად, მედია სტანდარტი ისედაც არსებობს, უბრალოდ, ამ მედია სტანდარტის აღსრულება არ ხდება საქართველოში. აღსრულების მექანიზმი არ არსებობს. თვითრეგულაციამ, ფაქტია, არ იმუშავა. აქედან გამომდინარე, ამიტომ არის საჭიროება, რომ მედია სტანდარტების დაცვის მექანიზმი არსებობდეს.
ხელისუფლების სურვილი არ არის, რომ მედია იყოს ცენზურის ქვეშ. ამ ხელისუფლების პირობებში არც ერთ მედიასაშუალებას რაიმე სისტემური, ან სხვა სახის პრობლემა არ შექმნია, იმიტომ, რომ ეს არ არის ამ ხელისუფლების მიზანი და ხასიათი. სახეზე გვაქვს ერთი მოცემულობა და ფაქტი - მედიასივრცე დღეს დაზიანებულია. სწორედ ამას სჭირდება მოწესრიგება, დარეგულირება. ევროპის ყველა სახელმწიფოში არსებობს მედია რეგულაციები და თუ იქ ეს მედია რეგულაცია ნიშნავს მაღალი სტანდარტის მიღწევის საშუალებას, რატომ უნდა ნიშნავდეს ჩვენს ქვეყანაში საპირისპიროს?!," - განაცხადა ქადაგიშვილმა.
