ტრამპის ადმინისტრაცია კიევს გენერალური ასამბლეის რეზოლუციის პროექტზე უარის თქმას სთხოვდა, რომელშიც რუსეთის სრულ მასშტაბიანი აგრესია იყო დაგმობილი და უკრაინის ტერიტორიიდან რუსული ჯარების გაყვანის მოთხოვნაზე იყო საუბარი. ინფორმაციას „ვაშინგტონ პოსტი“ ოთხ ანონიმურ წყაროზე დაყრდნობით ავრცელებს.
წყაროს თქმით, თავდაპირველად ვაშინგტონმა კიევს გაეროს რეზოლუციის პროექტის შეცვლა შესთავაზა, რათა „ის უფრო სუსტი გაეხადა“. შემდეგ შტატებმა წარადგინა საკუთარი რეზოლუციის პროექტი და უკრაინას მოსთხოვა უკან წაეღო თავისი ვარიანტი, რომელიც უკვე შეთანხმებული იყო სხვა პარტნიორ ქვეყნებთან.
„ვაშინგტონ პოსტის“ უკრაინულმა წყარომ განაცხადა, რომ ამ წინადადებამ კიევი „შოკში ჩააგდო“ და პრეზიდენტმა ვოლოდიმირ ზელენსკიმ უკრაინის საგარეო საქმეთა სამინისტროს არსებული რეზოლუციის გამოთხოვა აუკრძალა.
