დღის წესრიგი ოპოზიციის და მათი გარე უფროსების, მათი გარე მფარველების არის აგებული რევოლუციურ სცენარზე, - ასე ეხმაურება საპარლამენტო ფრაქცია „ქართული ოცნების“ თავმჯდომარის მოადგილე ლევან მაჭავარიანი, პარტია „ახალის“ დამფუძნებლის ნიკა გვარამიას განცხადებას.

ლევან მაჭავარიანის თქმით, საგამოძიებო უწყებები არიან მოწოდების სიმაღლეზე და დესტრუქციის ნებისმიერ მცდელობებზე იქნება მკაცრი პასუხი.

„ეს ყველაფერი ძალიან ემთხვევა მაკკეინის ინსტიტუტის დასკვნას, სადაცა ასევე იგივე რიტორიკა შემოგვთავაზეს, რომ მნიშვნელობა არ აქვს „ქართული ოცნება“ რა ანგარიშით გაიმარჯვებს, მნიშვნელობა არ აქვს, რომ ამ გამარჯვებას აღიარებენ საერთაშორისო დამკვირვებლები. მთლიანად დღის წესრიგი ოპოზიციის და მათი გარე უფროსების, მათი გარე მფარველების არის აგებული რევოლუციურ სცენარზე. მნიშვნელობა არ აქვს გარედან ჩაერევა ვინმე თუ შიგნიდან დააპირებს ამის განხორციელებას, ჩვენი საგამოძიებო და სამართალდამცავი უწყებები არიან მოწოდების სიმაღლეზე და ყველანაირ პრევენციას მოახდენენ ასეთი ქმედებების და ყველაფერს გაეცემა ძალიან მკაცრი პასუხი“, - განაცხადა ლევან მაჭავარიანმა.

ნიკა გვარამიამ „ფორმულას“ ეთერში 26 ოქტომბრის საპარლამენტო არჩევნებთან დაკავშირებით ისაუბრა და აღნიშნა, რომ არავის აინტერესებს, რას გამოაცხადებს ცენტრალური საარჩევნო კომისია, ვინაიდან ის სულ იტყუება. მისივე თქმით, დასავლელი ელჩები ემზადებიან არჩევნების შემდეგ „ბასრი განცხადებები გააკეთონ“.