ახალგაზრდის გამოშვების წინააღმდეგი არავინაა. აქ საუბარია იმაზე, რომ პოლიტიკურ გადაწყვეტილებას იღებს სალომე ზურაბიშვილი დესტაბილიზაციის შექმნის მიზნით, - ამის შესახებ კონტროლის პალატის ყოფილი თავმჯდომარის, სულხან მოლაშვილის ძმამ თორნიკე მოლაშვილმა პრეზიდენტ სალომე ზურაბიშვილის მიერ ლაზარე გრიგორიადისის შეწყალების გადაწყვეტილების შეფასებისას განაცხადა.

„ყველაფერს აკეთებს სალომე ზურაბიშვილი, რომ საქართველოში დესტაბილიზაცია შეიქმნას. ამ პოლიციელების, ვისაც ფიზიკური შეურაცხყოფა მიაყენეს და ვინც დაზიანებები მიიღო, მათ უფლებებს ვინმე იცავს? რა პასუხი უნდა გასცეს სალომე ზურაბიშვილმა პოლიციელებს?

ახალგაზრდის გამოშვების წინააღმდეგი არავინაა. აქ საუბარია იმაზე, რომ პოლიტიკურ გადაწყვეტილებას იღებს სალომე ზურაბიშვილი დესტაბილიზაციის შექმნის მიზნით. მიხეილ სააკაშვილსაც მომავალში აუცილებლად შეიწყალებს. ალბათ, ეს საარჩევნოდ იქნება. ყველაფერს გააკეთებს ეს ქალბატონი, რომ წინასაარჩევნოდ დაძაბოს სიტუაცია საქართველოში“, - აღნიშნა მოლაშვილმა.

საქართველოს პრეზიდენტი სალომე ზურაბიშვილი აცხადებს, რომ ლაზარე გრიგორიადისის შეწყალების გადაწყვეტილება მიღებული აქვს, თუმცა, დოკუმენტზე ჯერ ხელი არ მოუწერია.

სასამართლომ ლაზარე გრიგორიადისს 9 წლით თავისუფლების აღკვეთა მიუსაჯა. გამოძიება გრიგორიადისს პოლიციელზე თავდასხმასა და მისი ჯანმრთელობის ხელყოფას, ასევე სხვისი ნივთის დაზიანებას ედავებოდა.